Эл мюлкде къармашханла вакцинацияны заманында ётерча

Кёп болмай Россейни Эл мюлк министрини биринчи орунбасары  Джамбулат Хатуов бардырып видеоконференция халда кенгеш  болгъанды. Анда коронавирус жайылыргъа къоркъуулу   кезиуде  агропромышленный  комплекс предприятиялада уруннганла  жууукъ заманда  вакцинацияны ётерча анга  сюзюлгендиле.   Анга регионлада  профильли ведомстволаны таматалары, ол санда КъМР-ни Эл мюлк министри  Хасан Сижажев, саулукъ сакълау  министрни орунбасары Аслан Кауфов эм  Роспотребнадзорну келечилери да къатышхандыла.  

  Тюбешиуню ача, Джамбулат Хатуов  былтыр  пандемияны кюйсюзлюгюне да къарамай  эл мюлкде къармашханла ишлерин  тохтатмай жетишимли бардыргъанларын эмда къыйын кезиуде  ахшы сынам алгъанларын да белгилегенди. 

Ол  бюгюнлюкде  эпидемиология  болум иги жанына  тюзелгенликге ауруу жангыдан кюч алыргъа боллугъун  эсге салгъанды, аны ючюн  тохтаусуз мониторинг бардырыргъа  эм профилактикагъа да аслам эс бурургъа кереклисин  эсге салгъанды.    Эм биринчи мал сойгъан, жарашдыргъан, продукцияны айыргъан   цехледе эм жумушларын  тохтаусуз бардыргъан башха предприятиялада  уруннганла да  вакциянацияны ётселе иги  боллугъун айтханды.     Болсада ол  кишиге   борч болмагъаны, хар ким кеси  ыразылай этерге эркинлиги  болгъанын да чертгенди.

Кенгешни ахырында регионлада агропромышленный комплекслени келечилерине Саулукъ сакълау министерство  бла бирге  ишчилерине жетер тенгли бир вакцина алырча  заявкаланы хазырларлары  да  буюрулгъанды.

Курданланы Сулейман.