Ариулукъ акъыллыгъа берилсе

Бу материалымы жигити Жангуразланы Борисни къызы Сафиятды. Субай, акъыллы кёзлю къызгъа къарасанг, аны бийик адамлыгъына ишекли бир да боллукъ тюйюлсе. Ол магъаналы ышандан сора да, аны гиртчилигине сукъланырчады.  Дипломларына кёре филолог (ингилиз тил), экономист эки жыл мындан алда Нальчикде Басма юйню жанында  эр кишилеге деп  «CHOP-CHOP» атлы салон ачханды.  Жаш директорну бизнес-оюмларына тынгыласанг,  бюгюннгю дунияда да быллай хунерли жашларыбыз бла къызларыбыз болгъанларына къууанырыгъынг келеди.

Сафият Огъары Малкъарда туугъанды. Аны аппасы Урунууну Къызыл Байрагъы  орден бла саугъаланнган Жангуразланы Абулла аты айтылгъан адам болгъанды – ишде алчы, жамауат арасында намысы-сыйы жюрюген огъурлу инсан. Дагъыда бир ненча орден бла майдалны иесин Социалист Урунууну Жигити атха эки кере кёргюзтгендиле, алай ол кезиуде политика сылтауланы хатасындан, ол саугъа берилмегенди.

Абулла  Мисирланы Халимат бла огъурлу юйюр ёсдюргендиле (эки къыз бла бир жаш). Жашы Борис элни администрациясыны таматасы болуп бир ненча жыл ишлегенди. Алай  аны жашауунда не заманда да сабийлеге билим бериу, аланы тюз ниетледе юйретиу магъаналы  жерни  алгъанды. Борис Абуллаевич Огъары Малкъарны 2-чи номерли орта школуну директоруну къуллугъунда  къыркъ жылдан артыкъ заманны ичинде бир ненча тёлюню уллу жашау жолгъа чыгъаргъанды.

Аллай тамырладан а, сёзсюз, ариу чирчик чыкъмай къалмайды. Сафият беш сабийден бек гитчелериди.  Аны не заманда да окъуугъа, жангы башламчылыкълагъа итиниулюгю уллу болгъанды.  Туугъан элине уа таулу адет-тёреледе ёсген къыз мени бешигим, чексиз ёхтемлигим, дейди.  Бусагъатда кёп жаш адамла элден чыкъгъанларын артыкъ айтыргъа, сагъыныргъа сюймейдиле. «Тойгъан жерден туугъан жер татлы деген сёз барды таулулада.  Бизни бийик таула, тик къаяла,  таза черекле жашауму ахырына дери биргеме боллукъдула. Малкъар мени тюшюмде кёрюнеди, тюнюмде да, къайда болсам да, аны излегенлей турама»,- дейди Сафият а ушагъыбызда.

Кеси-кесине кертини айта, жашау болумланы тюз жанындан кёре, багъа биче билген адамгъа хунерли дерге боллукъбузму. Сёзсюз, хау.  Бизнес бла кюрешгенлеге уа кертилик бютюн керекли ышанды.  Сафиятда, насыпха, ол ниетлеге табыныу къылыкъ артыгъы бла окъуна барды.

- Къайсы проектге да битеу жюрегинг бла берилирге керексе. Алай болмаса, хайыр да чыгъарыкъ тюйюлдю, адамла да санга тартынмазла,- деп оюмлайды  жаш предприниматель.

«CHOP-CHOP» салонда хар зат хайырланыучуну ыразы этерча алай къуралгъанды. Жашла ары келген сагъатларын ырахатлы оздурадыла, керексиз хапарла башларын аурутмагъанлай, аланы излемлерине кёре бийик профессионал устала чачларын ариу, бусагъатдагъы модагъа кёре ишлейдиле.  Мында олтургъан шинтиклери  окъуна эр кишилени анатомия энчиликлерине кёре  жарашдырылгъандыла. Эрттегили совет заманлада лозунгладача, хар зат хайырланыучуну таплыгъына деп.

Баям, аллай жарыкъ талпыныулукъ болмаса, адам тутхан ишинден да не хазна къууаныр. Бирле ахча, ырысхы излеуде заманларын оздурадыла. Хау, ол да керекди, алай харкюнлюк жумушунг жюрегинги чакъырыуу эсе, андан уллу насыб а къайда.  Аллынга келген адамгъа жюрек жылыунгу саугъалай билсенг, кюнлени биринде ол къайтарылмай къалмазлыгъы да хакъды.

Сафиятны оюмуна кёре, бизни республикада адамла заманларын багъалай билмейдиле. «Россейде жашагъан къадарымда кёрюп тургъанма анда бу жаны бла жамауат иги да низамлыды, -дейди ол. – Хар такъыйкъаны багъалай биледиле ала. Бизде уа, бютюнда тиширыуларыбыз, будуар халда салонланы кюсегенлей турадыла, анда хапарла айтып. Неда эрттенден ингирге дери заманларын оздурур ючюн соцсетьледе жазыула этип турадыла. Аллай бошлукъну ахырысы бла да ангыламайма».

Мени жигитим ариулукъну индустриясында ал атламларын этгенди. Ийнанама, аны ол итиниую ахшы эсеплеге келтирлигине.  Ариулугъ а, белгилисича,  поэзия бла байламлыкъдады.  Ол жаны бла оюмун билдире, ушакъ нёгерим Къайсынны, Керимни, Танзиляны  назмуларындан юзюклени окъуйду. Лирика къызны жюрегине бек жууукъду, ол аны жол нёгериди деп базынып айтырчады. Шекспирни чыгъармаларын ингилиз тилде окъуп, буруннгу заманланда кёз къарамланы тазалыкъларын чертеди. Ф. Шиллер, Д. Китс,  Н.Ленау, А. Мицкевич эм башха атлары айтылгъан тыш къыраллы поэтле да къызны  китапханасында, жашауунда да сыйлы жерлерин аладыла.

Бусагъатдагъы дунияда жаш адамла къайсы кёз къарамланы тутаргъа, къаллай мурдоргъа таяныргъа боллукъдула. Бу соруу шёндю не десек да бек магъаналыды.  Дин жаны бла бюгюнлюкде кенг жайылгъан ниетле, кёребиз,  кёбюсюнде игиге келтирмейдиле, запад къыралланы къыйматлары бизге ахырысы бла да келишмейдиле, да сора не къалады да? Бу сорууну кеси-кесине Сафият да кёп кере бергенди.  Ол оюм этгенден, жангыз да миллет культурабызда, ата-бабаларыбыз къойгъан жашау дерследе табарыкъбыз биз жюрек тынчлыкъны, ырахатлыкъны да.

Жер башында уллу тюрлениуле бола тургъанда, тиширыу да аладан, сёзсюз, кенгде къалмайды. Сюйсе-сюймесе да, ол да башхаракъ болады, жашау этер мадар излейди, кёз къарамларын да тюрлендирирге тюшеди. Бусагъатдагъы тиширыу къаллай болургъа керекди деген сорууну Сафиятха да берген эдим. Аны жууабы мени бираз сейирсиндирген окъуна этгенди. «Киштикча, - дейди ол. –Аны бийик билими, акъылы, бираз кеси-кесине базыныулугъу эмда хар жашау болумгъа кёре тюрлене билген къылыгъы болургъа керекдиле». Алай эр киши уа, къызны оюмуна кёре, тиширыугъа ышаннгылы таянчакъ эм бийик юлгю болургъа тийишлиди. Быллай кёз къарам терсди деп, даулашырыкъ адам не хазна чыкъсын.

Айтханыбызча, Жангуразланы Сафият  адамланы сыфатларын  айбатлы этерге излейди. Ол кеси да чырайлы инсанды, ариулукъ акъыллыгъа берилсе уа, Зумакъулланы Танзиля айтханыча, ол этип турур адамлагъа къуллукъ. Биз да анга сюйген адамларыны араларында кёп жарыкъ кюнле  эмда  тутхан ишинде бийик жетишимле тежейбиз.

Жангуразланы Нажабат.
Поделиться: