Жангычылыкълары бла шагъырейлендиргендиле, келир тёлюлеге письмо жазып асырагъандыла

Къабарты-Малкъар къырал аграр университетде  "Илмуну ыйыгъыны» эсеплери чыгъарылгъандыла. Анга аталгъан жыйылыу байрамгъа айланнганды. Анга башха вузланы студентлери да къатышхандыла.

Байрамны  бийик окъуу юйню  илму-тинтиу иш жаны бла проректору Анзор Езаов ачханды. Ол конкурсха къатышханлагъа,  аны къурагъанлагъа да ыспас этгенди. "Бу  ишге университетни битеу коллективи  тири къатышханды. "Илмуну ыйыгъы-2019" аны ючюн алай жетишимли болгъанды",-дегенди.

Андан сора  студентле  видеороликлерин кёргюзтгендиле. Аладан биринчиси - Къабарты-Малкъар къырал аграр университетге  тюрлю-тюрлю жыллада  илму ишге  башчылыкъ этген проректорлагъа, экинчиси - жангы тарыхха, агрономия факультетни преподавательлерине,  студентлеге жоралана эдиле. Ахырында уа илмуну ыйыгъы баргъан кезиуде алыннган видеофильм  да кёргюзтюлгенди.

Студсоветни  председатели Ахмет Коготыжев а  илму ишни   эмда  грантла къоллу болгъанланы юсюнден   билдириу этгенди.

Къууанчлы жыйылыуну кезиуюнде  преподавательлени бла студентлени араларында  илмуда эм жангычылыкълада атларын айтдыргъанлагъа  КъМКъАУ-ну  саугъалары  берилгендиле. Алагъа аспирантла  Узейланы Надежда эмда профессор Ирина Ханиева тийишли болгъандыла.

Монографияла бла байламлы конкурсда была  хорлагъандыла: "Биология илму"   номинацияда   ветеринар медицина кафедраны доценти  Алан Хуранов бла  Москвада К.И.Скрыбин атлы Къырал ветеринар эмда  биотехнологияла  академияны  профессору  Борис Панков. "Техника илмула"  номинацияда природообустройство кафедраны таматасы, доцент Азретали Дышеков,  аспирантла Узейланы Надежда бла   Астемир Шогенов.

Быйыл дагъыда энчи саугъала жарашдырылгъан эдиле - юч бийик окъуу юйню белгилерини суратлары бла кружкала. Ала КъМКъУ-ну  КъМКъАУ-ну,  эмда СКГИИ-ни студентлерине бла  профессорларына  жетгендиле. Вузну тюрлю-тюрлю факультетлеринден бу ишге тири къатышхан жаш адамлагъа  уа грамотала, бюсюреу къагъытла  берилгендиле.

Байрам анга къатышханланы келир тёлюлеге письмосун  ( "Заманны капсуласы-2029") Къабарты-Малкъар къырал аграр университетни  музейине   къууанчлы халда  ётдюрюу бла бошалгъанды.  

Холаланы Марзият.
Поделиться: