Закондан билимли этер муратда

Кёп болмай Чегем шахарны Маданият юйюнде «Рыцари закона» деген районла аралы  конкурс болгъанды. Аны      акъылбалыкъ болмагъанланы  ишлери  жаны бёлюм  эм  билим бериу управление жаш адамланы саулукълу, къоркъуусуз  жашау бардырыргъа,  терроризмден, экстремизмден  башха аманлыкъладан да сакъланыргъа эмда патриот сезимлерин кючлергеди.    

Анга  районну школларындан  оналты къауум къатышханды. Ала,  сахнада ойнап, жырла, назмула айтып, тепсеп эришгендиле  эм аман къылыкъланы зараныны юсюнден кеслери тюшюрген роликлени да кёргюзтгендиле. Жаш адамла бюгюнлюкде жамауатны жарсытхан проблемаланы, алагъа къажау турурча не этерге керек болгъаныны юсюнден айтхандыла. Бу жаны бла  адет, намыс  да ахшы себеплик этгенлерин   билдиргендиле.  Ахырында чыгъарылгъан эсеплеге кёре, яникойчула - биринчи, Чегем шахарны 1-чи, 4-чю номерли школларыны келечилери  - экинчи эм лячинкъаячыла  уа ючюнчю жерни алгъандыла.   

Хорлагъанла Билим бериу управленияны грамоталары бла саугъаланнгандыла, башхалагъа да  дипломла берилгендиле.  Яникой элни иймамы, Чегем районну  ич
ишлерини  жамаут советини келечиси Элеккуланы Хасан биринчи жерни алгъан къауумгъа энчи саугъа этгенди.

Эришиулени къурагъанла белгилегенлерича, быллай конкурсла ёсе келген тёлюню терс жолгъа ажашырындан  сакълайдыла. Ала  террордан, зулмучулукъдан, ичгичиликден, тютюн ичиуден, наркоман болуудан эмда башха законсуз ишледен  кери этерге себеплик этедиле.