Фермерлеге интернет бла сатыу этерча себепликге

Россельхозбанкны «Кеси Фермерчилигибиз» цифралы экосистемасыны чеклеринде агропромышленность комплексде предпринимательство бла кюрешгенлеге «Кесибизники» деген онлайн-проект жарашдырылгъанды. Ол фермерлени эмда алыучуланы бирикдирикди, деп белгилегендиле финанс учрежденияда.

Бу платформада (https://svoe-rodnoe.ru) къайсы фермер да регистрацияны ётюп, чыгъаргъан аш-азыкъларыны эмда продукциясыны каталогун, аланы суратларын, видеосун салып сатыу этерге эмда агротуризм жаны бла жумушла тапдырыргъа боллукъду.

Мюлклеге да ол бек иги амалды, товарларын саудюгерчилеге кёчюрмей, тюзюнлей сатарча. Алыучуланы уа анда аслам продукцияны ичинде кеслерине тийишлисин учузуракъ багъасы бла табаргъа онглары боллукъду.

Проект жаланда аш-азыкъла бла чекленип къалмайды. Анда эл мюлк бизнес бла кюреширча абериле да бардыла. Ол санда урлукъла, семиртгичле, битимлени къоруулагъан препаратла, техника, мирзеу, мал ашла, агрохимия – битеу да он мингден артыкъ тюрлюсю.

Энтта да бир бёлюмюнде фермерле кеслерине ишчиле табаргъа боллукъдула. Шёндю беш минг чакълы вакансия барды анда.

Телеветеринария сервис а малчылыкъда къармашханлагъа сау кюнню онлайн-халда ветеринария жаны бла болушлукъ берир умутда къуралгъанды.

Предпринимательлеге – онлайн бухгалтерия эмда юристледен болушлукъ, битимчилик бла кюрешгенлеге – къайсы урлукъ иги тирлик бла къууандырлыгъыны юсюнден толу информация, дагъыда агротехнологияланы картасы, къырал жумушланы навигатору, малланы эсеплеген эмда контроль этген сервис эмда кёп башха сервисле – порталда агробизнес бла кюрешгенлеге деп аланы битеуда жыйырмадан артыкъ тюрлюсю барды.