Гара сууларыбызны жууукъ кезиуде Германияны тюкенлеринде кёрюрге да боллукъду

Бюгюнлюкде республиканы тюкенлеринде «Babugent» деген аты бла 1,5 литрлик  эмда 700 граммлыкъ шешалада гара сууну кёрюрге боллукъду. Ол кесин энчи этикетка бла танытады:  тауланы бетинде субай жугъутурну сураты бла. Шешаны юсюнде жазылгъаныча, суу  Шимал-Кавказ бийик-тау заказникде чыранладан къуюлады.  Кертисин айтханда, алыучуланы арасында анга сейир уллуду десек да жангыллыкъ тюйюлбюз. Танышларымы кёплери  бу сууну татыуун айтып, аны сайлагъанлары къууандырады.

  Черек районну Бабугент элинде экология жаны бла таза гара суула къуюлгъан «Babugent» завод ачылгъанлы кёп болмайды. Шёндюгю оборудование бла жалчытылыннган предприятияда жангы ишчи жерле къуралгъандыла. Бу инвестиция проектге 200 миллион сомдан аслам къоратылгъанды. Завод ахыр онжыллыкълада элде ачылгъан биринчи предприятие болгъанын эсге алсакъ, бу иш бютюнда къууанчлыды. 

Аны учредительлеринден бири – заводну башчысы Аттасауланы Тахирни бизге айтханына кёре, предприятияны мекямы бир жылгъа битдирилгенди, ол мурдорундан башлап, жангыдан ишленнгенди. Анда ал кезиуде 6 адам ишлейди, алай энтта 16-дан а стажировкадан ётедиле, ала да окъууну бошасала, иш къоллу боллукъдула. 

Оборудованияны юсюнден айтханда, станокла Германиядан, Польшадан эмда Литвадан келтирилгендиле, ала бийик технологиялыдыла. «Биз формала сатып алгъанбыз,   пластик шешаланы  чыгъаргъан станогубуз барды. Алыкъа завод толу кючю бла ишлемейди – сагъатха 2,5 минг шеша къуюлады, аны жууукъ кезиуде 5 мингнге жетдирликбиз, алай жерибиз кенгди, аны да кёбейтирге онгубуз барды»,-дейди ол.

Бюгюнлюкде гара сууланы  рыногу уллуду, тыш къыралладан келтирилгенледен   башлап, кесибизде къуюлгъан тюрлю-тюрлюлери кёпдюле. Алай  «Babugent» не бла энчиди, аны адамла не ючюн сатып алыргъа боллукъдула деген соруугъа жууаплай, Аттасауланы Тахир  предприятие шауданны тийресинде ишленнгенин билдиргенди.  Сууну качествосуна уа озгъан ёмюрню 80-чи жылларында окъуна эс бурулуп, ол тинтилгенлей тургъанды.  «Шаудан сууну татыуу башхады, мен кесим да аны сюйюп ичеме. Бизни продукцияны бир кере кёрген, артда къайтып келеди.  Биринчиле болуп былайда суугъа французлу бизнесменле эс бургъан эдиле,  завод ишлетирге умутлары да болгъанды. Алай къырал чачылгъаны бла ол муратла юзюлгендиле»,-деп къошханды бизни ушакъ нёгерибиз.

Жарсыугъа,  бабугентчиле къуйгъан суу республиканы тюкенлеринде алыкъа жокъду. Тахир айтханыча, Москва, Калининград бла келишимле этилип, продукция бу уллу шахарлагъа элтиледи. «Дагъыда тыш къыраллы рынокга чыгъаргъа мурат этебиз, бюгюнлюкде тийишли документле хазырланадыла. Бу умутубуз толса, «Babugent» деген ат бла гара сууланы Германияны тюкенлеринде кёрюрге боллукъду. Алай сизни продукцияны алыргъа сюебиз, аны тюкенибизде саллыкъбыз деп келгенлеге да угъай демейбиз. Алай бла республиканы рыногуна да чыгъарыкъбыз деп ийнанама», -дейди ол.

Ишсизликни, къолайсызлыкъны, ышаныулукъ болмагъаныны хатасындан жаш адамла республикадан кетип баргъанлары уллу жарсыуладан бириди. Бизни ушакъ нёгерибиз акъыл этгенича, тау элледе ма былай артыкъ уллу болмагъан предприятияла ишлетирге неда файда келтирген башха иш бла кюреширге, алай бла уа баш кечиндирирге битеу онгла бардыла.

- Адамла власть жукъ да этмейди, болушмайды деп тарыгъып турадыла, кеслери уа жерлеринден да тепмейдиле. Алай, сёз ючюн, биз бу заводну проектин хазырлагъаныбызда, документлени къурагъанда, мекямны ишлетгенде да районну администрациясы, Правительство да  уллу болушлукъ этгендиле,  тыйгъычлагъа, чырмаулагъа тюбемегенбиз. Республикада бизнесни айнытыугъа энчи эс бурулады деп шарт айталлыкъма. Жаланда сакълап турмай, тири болургъа, тёгерекге-башха къарап, ма бизде уа быллай иш къураргъа боллукъ эди деп, башламчылыкъла этерге керекди. Ишлерге сюйгеннге онгла табыладыла. Къырал даражада уа тюрлю-тюрлю программала бардыла, ала бла хайырланыргъа керекди,-дейди бизни ушакъ нёгерибиз.