«Хорламларыны атама бла анама, тренерлериме, тегнлериме атайма»

 Хар миллетни да тамблагъы кюнюн къурагъан жаш тёлюсюдю. Таулу халкъда уа умутландыргъан жашла бла къызла, айхай да, бардыла. Ала маданиятда, илмуда, спортда жетишимлери бла атларын айтдырадыла. Аллай уланларыбыздан бири дзюдочу Гайыланы Омарды.

Омар 2003 жылда Гайыланы Зейтунну бла Мариямны юйюрлеринде туугъанды. Бусагъатда Хасанияны 16-чы номерли школунда окъуйду, дзюдо бла он жылындан бери тренерле Дмитрий Ивановда бла Анзор Апхудовда кюрешеди. Спортну бу тюрлюсюн Омар бошдан сайламагъанды - атасы кеси заманында дзюдогъа жюрюгенди, артда уа залгъа жашын да келтиргенди. «Жарауну биринчи кюнюнден окъуна жаратханма, атамы бу оноууна бир кюнню да сокъуранмагъанма. Дзюдо приёмладан сора да, эсли болургъа, къарыуунгу ангыларгъа эм сермешде аны тюз хайырланыргъа юйретеди. Спорт инсанны халин да айнытады. Адам огъурлу, адепли болургъа, ётюрюкден кери турургъа керекди», - дейди ол.

Бирде инсанны алгъа барыргъа къууанчдан эсе ачыу бегирек юйретеди. Биринчи эришиуюн Омар къытдыргъанды, алай ол жашны бютюн кючлю хазырланыргъа, хорламсыз къалмазгъа кёллендиргенди. Кёл салып ишлеу а ахшы эсепге келтирмей къалмайды. Черкесскде дзюдодан КъЧР-ни Правительствосуну башчысыны орунбасары Тебуланы А.М.-ни хурметине аталгъан эришиуде Омар, битеу тюбешиулерин хорлам бла бошап, алтын майдалны къытханды. Ызы бла Череповец шахарда дзюдодан окъуучуланы IX жай спартакиадаларына къатышханды. Ары кеслерин сынаргъа къыралны 47 субъектинден 270-ге жууукъ жаш бла къыз келген эдиле, андан да Омар биринчи жер бла къайтханды.

Бир кесек заман мындан алгъа уа Азербайджанны ара шахары Бакуда, Совет Союзну эки кере Жигити генерал-майор Ази Аслановну хурметине аталып, дзюдодан XXXIX халкъла аралы эришиу бардырылгъанды. Анга Россейден, Азербайджандан, Украинадан, Къазахстандан, Грузиядан, Узбекистандан, Тюркден бла Белоруссиядан 2002-2004 жыллада туугъан 350-ге жууукъ спортчу къатышхандыла. Анда Омар ючюнчю жерге чыкъгъанды.

Жаш адам республика, округ даражалы эришиуледе да хорлагъанланы къауумуна кирмей хазна къалмагъанды. Алай эм магъаналы жетишимлерине уа спортчу Россейни биринчилигинде бла Европаны кубогунда доммакъ майдалланы санайды. Къырал даражалы эришиуде саугъаланнганланы къауумуна киргени бла Омарны жыйымдыкъ командагъа алгъандыла, анда ол жети сермеш бардыргъанын белгилерчады. Аны санында ол Европаны кубогуна Италияны Фоллоник шахарына атланнганды. Анга 25 къыралдан 500-ге жууукъ гёжеф къатышхан эдиле. Омар анда 81 килограммгъа дери ауурлукъда эришгенди. Жарым финалда  къытдыргъанды, алай, гитче финалда Нидерландыледен Ван Оострумну хорлап, ючюнчю жерге чыкъгъанды.

Жетишимлерин Омар ата-анасына, тренерлерине, залдан тенглерине атайды. «Аласыз бу хорламла боллукъ тюйюл эдиле. Спорт башха республикалада, Россейден тышында да жангы шуёхла табаргъа себеплик этеди. Татамиде бир бирибиз бла сермешгенликге, андан тышында уа тенглебиз», - деп чертеди ол.

Спорт жашны окъуууна чырмау этмейди, ол школну бошагъандан сора юриспруденция жаны бла билим алыргъа умут этеди. Бусагъатда да Омар Россейни жыйымдыкъ командасына киреди, мураты Олимпиаданы чемпиону болургъады.

Кульчаланы Зульфия.
Поделиться: