Бу айдан башлап законлада, жашауда да не зат тюрленирикди

«Больничный» къагъытланы жангы жорукъла бла жарашдырыу, нотариусда келишимлени женгилирек халда къурау, музыка инструментлеге паспортла эм башха жангычылыкъла.

Льготаланы юсюнден билдириу

Энди бизни къыралда льготала алыучулагъа не тюрлю социал тёлеулеге эмда жумушлагъа тийишли болгъанларыны юсюнден билдириуле жиберип тебирерикдиле.

Аланы хайырланыр ючюн гражданла асламысында заявление берирге борчлудула. Алай шёндюге дери кимге къаллай льгота бериллигини юсюнден билдирген тёре болмагъанды; адамла аны тюрлю-тюрлю ведомстволагъа жюрюп, кеслери тохташдырыргъа керек эдиле. Иш алай болгъаныны хатасындан кёпле, ол санда пенсиячыла, сакъатла, къыяулукълары болгъан сабийлени ата-аналары тийишли социал жумушладан къуру къала эдиле.

Энди уа гражданлагъа битеу бериллик льготаланы юсюнден мычымай билдирирге сёз бередиле. Информацияны «Госуслуги» порталгъа кирип алыргъа боллукъду.

Андан сора да, льготниклеге поездлеге эмда электричкалагъа билетлени Интернет бла сатып алыргъа амал берилликди. Ол да сагъынылгъан порталда тамамланырыкъ жумушду. Кассада сатып алырча уа билетни, тийишли документлени кёргюзтюрге керекди.

Медицина ишчилени тарыгъыуларына эс бурургъа

Бу айдан башлап, COVID-19 ауруу жукъгъан неда алай болур деген ишекликге тюшген пациентле бла ишлеген, кеслери да тийишли тёлеулени алмагъан медикле, ол бузукълукъну юсюнден къырал жумушланы сайтында («Госуслуги») жазып билдирирге боллукъдула.

Заявленияда адам кесини регионун, медицина ишчилени къайсы категориясына киргенин, уруннган организациясын эмда ахча къайсы ай ючюн тёленмегенин билдирирге керекди.

Алай бу сайтны тийишли бёлюмюнде айтылгъаннга кёре, быллай заявление болгъанлыкъгъа, ахча сорулмай олсагъат тёленип къаллыкъ тюйюлдю. Ол (заявление) къырал власть органлагъа жиберилликди. Ала уа медицина учрежденияда тинтиуле бардырып, тюзлюкню тохташдырып, ызы бла оноу этерикдиле.

Налогланы юсюнден билдириуле эмда микрофинанс организациялагъа чеклениуле

Бу айдан башлап, гражданла къуруда льготаланы юсюнден билдириуле угъай, кеслери тёлерик налогланы, тазирлени, башха борчланы юслеринден эсгертиуле да аллыкъдыла. Алай болурун сюйгенле федерал налог службаны (ФНС) сайтында ол информацияны «СМС неда электрон почта бла алыргъа ыразыма» деген форманы толтурургъа керекдиле. Аны къагъытха чыгъарып, къол бла жазып, ызы бла артха письмо бла жиберирге да боллукъду.

Дагъыда бир жангычылыкъ микрофинанс организацияланы ишине энтта да чеклениуле салыу бла байламлыды. Энди ала ахчаны бир кюннге эм уллусу - бир процентге ёнкючге берирге эркиндиле. Бир жылгъа ол 365 процент болады. Тийишли документ бла дагъыда берилген ахчаны ёлчемине чек салынады. Битеу процент тёлеулени алып тергегенде, адамны борчу ол алгъан ахчадан эки кереден кёп болмазгъа керекди.

«Больничный» - жангы жорукъла бла

Декабрьни онтёртюнчюсюнден башлап, «больничный» къагъытланы жарашдырыу жорукъла тюрлендириледиле. Анга кёре, талай организациялада ишлеген гражданин быллай электрон документни жаланда бирин жарашдырыргъа боллукъду.

Дагъыда сабийлеге къарау сылтау бла больничный алгъанда, керек болса, барыны аты бла бирин неда хар бири ючюн башхасын жарашдырыргъа эркинлик берилликди. Аланы коронавирус ючюн сабий садиклени карантиннге жапсала да берликдиле.

Быллай электрон документни болжалын къагъыт документ бла, сюйсе уа экинчисин биринчиси бла созаргъа да боллукъду. Нек дегенде шёндю къыралда аланы экиси да жюрюйдюле. Ишлеген жеринде адам электрон «больничныйни» номерин кёргюзтюп къойса да боллукъду.

Коронавирус жайылыр деген къоркъуу бла карантинде олтургъанлагъа уа больничный битеу ол кезиуге берилликди.

Нотариусла къатышып келишимле

Бу ай бошала-бошалмаз (23 декабрь) Россейде «цифралы нотариат» бла байламлы тюрлениуле кийирилликдиле – аланы былтыр декабрьде къабыл этген эдиле. Бу документге кёре адамлагъа эмда бизнесге нотариусла бла ишлеу женгилирек боллукъду. Энди тийишли жумушланы бир кесеги электрон халгъа кёчюрюллюкдю. Аланы къайсылары алай берилирге боллугъу да тохташдырылгъанды. Ол, сёз ючюн, ахча кёчюрюлгенине шагъатлыкъ этиудю, залогда болгъан мюлкню юсюнден реестрден выписка бериудю, электрон документлени башхалагъа бериудю… Къауум юрист къатышып этилген келишимни да электрон халда тамамларгъа боллукъду. Сёз ючюн, башха регионда болгъан мюлк бла байламлы жумушланы.

Ишеклик тууса, гражданин ким болгъанын бирикген биометрия системагъа кирип тохташдырыргъа керекди нотариус.

Этил спиртни законсуз сатыу-алыугъа контроль

29 декабрьде этил спиртден фармацевтикада хайырланылгъан абериле чыгъарыучу оборудованиягъа эмда производствогъа жангы излемлени тохташдыргъан жорукъла кюч аллыкъдыла. Аны хайыры бла этанолну эмда спирт къошулуп жарашдырылгъан дарманланы фармацевтика производствосунда изленнген быллай спиртни законсуз сатыу-алыугъа чек салынырыкъды.

Музыка инструментлеге - паспортла

Бу айдан башлап Россейде маданият байлыкъгъа саналгъан музыка инструментлени энчи белгилери боллукъду. Ала уа къайда изленирикдиле десегиз, инструментлени иелери аланы бир талай заманнга тыш къыраллагъа чыгъарама деселе. Ары дери уа экспертиза этерге тюшерикди. Ызы бла Культура министерствода тийишли паспорт алыргъа. Анда инструментни эмда аны иесини юсюнден информация, экспертиза не зат кёргюзтгени жазыллыкъды. Ол бары да бу закон бла къураллыкъ бирикген базагъа тюшерикди. Паспортну болжалы он жыл бла чекленирикди.