Тынгылы ремонт ючюн льготалагъа кимле тийишлидиле

Кёп фатарлы юйлеге тынгылы ремонт этиу ючюн тёлеуню анда жашагъанланы бары да берирге керекдиле. Ол кеси да фатарны уллулугъуна кёре тергеледи. Бирлеге ол артыкъ ауур кёрюнмей эсе да, къолайсызлагъа уа неда кеслери жашагъан абаданлагъа ол, баям, алай да болмаз. Бизни республиканы кёп фатарлы юйлеге тынгылы ремонт этиу жаны бла регион Фондунда айтханларына кёре, 2016 жылда 39-РЗ номерли «Къабарты-Малкъар Республикада талай категория гражданлагъа къырал социал себеплик этиуню юсюнден» закон бла бу ишде льготала бардыла.

Алайды да, анга тийишлиликде ишлемеген пенсиячылагъа бу тёлеу азайтылады. Жыл санлары жетмишге жетгенле уа аны жаланда экиден бирин тёлерикдиле. Сексенден атлагъанла уа андан толусунлай эркин этиледиле.

Неллай бир компенсация бериллиги (аны ёлчеми) жашау журту тынгылы ремонт этиллик бир квадрат метрини багъасына эмда субсидияланы тергегенде хайырланылгъан регион стандартны ёлчемине кёре болады. Жыл санлары жетгенле социальный къоруулау аралагъа неда МФЦ-гъа заявление берселе, компенсация аны ызындан келген айдан башлап берилип тебирерикди. Ол кеси да борчлары болмагъанлагъа. Башхача айтханда, заявление жазгъандан сора адамгъа тёлеуюню (жыл санына кёре) жарымы неда ол толусунлай артха къайтарыллыкъды. Заявление бла бирге паспортну, СНИЛС-ни, ахча артха къайтарыллыкъ (банк) счётну номерин, тынгылы ремонт этиу ючюн ахыр айда берилген тёлеуню квитанциясын эмда борч болмагъанына шагъат этген къагъытны копияларын берирге керекди. Аны юсюне уа пенсиячы бла бирге ол фатарда кимле жашагъанларын да билдирирге тийишлиди.

Ахча алыучу адам быллай ремонт ючюн юч айны тёлемей туруп борч этсе, анга компенсацияны къайтарыу тыйылады. Дагъыда бу адам ишге орналса, тургъан юйюне иеликден кетсе, жашагъан жерин алышындырса, ауушса неда белгисиз тас болса, аны фатарында пенсиягъа чыкъмагъан инсан регистрацияны этсе да тёленирик тюйюлдю компенсация. Быллай шартланы юсюнден социал къоруулау органлагъа эки ыйыкъны ичинде билдирирге керекди.

Андан сора да, элли процент компенсацияны гражданланы талай категориялары алыргъа боллукъдула. Ол санда Уллу Ата журт урушну эмда аскер къаугъаланы ветеранлары эм инвалидлери. Ала ауушхан эселе, аланы юйдегилери; Ич ишлени органларыны, от тюшюуге къажау службаны, уголовный-толтуруу системада органланы эмда учрежденияланы кеслерини борчларын толтургъан кезиуледе сакъат болгъан келечилери. Аллай кезиуледе ауушхан эселе, аланы юйдегилери; «Блокадалы Ленинградда жашагъан» белги бла саугъаланнганла, кеслери да сакъатла болгъанла;  Экинчи Битеудуния урушну кезиуюнде фашистле къурагъан концлагерьледе, геттолада (акъылбалыкъ болмай) тутулгъан сакъат гражданла; Чернобыльде атылгъан АЭС-ни хатасындан лучевой ауруулары болгъанла (ала ауушхан эселе - компенсация юйдегилерине бериледи), анда аварияны кетериу ишлеге къатышханла эмда ол тийреледен башха жерлеге кёчюрюлгенле (ол санда сабийле да); «Маяк» производстволу биригиуде 1957 жылда аварияда тышына чыкъгъан радиацияны эмда Теча суугъа радиоактив къалгъан-къулгъанла тёгюлгенини хатасындан лучевой ауруу къозгъалгъанла эм сакъат болгъанла. Дагъыда ол аварияны кетериу ишлеге къатышханла эмда ол тийреледен башха жерлеге кёчюрюлгенле; эм къоркъуулу сфералада уруннганла. Аллай адамлары (юйюр таматала) ауушханланы юйдегилери; Семипалатинск полигонда ядерный сынау ишлени кезиулеринде радиация облучение алгъанла; 1-чи  эм 2-чи группалары болгъан сакъатла; Юйюрлеринде сакъат сабийлери болгъанла. Компенсация дагъыда урунууну эмда аскер къуллукъну ветеранларына, политика репрессияланы сынап реабилитация этилгенлеге, кёп сабийли юйюрлеге да бериледи.

Бу иш бла байламлы толу информацияны кёп фатарлы юйлеге тынгылы ремонт этиу жаны бла регион операторну www.kapremontkbr.ru интернет сайтында билирге боллукъду. Ким къаллай компенсациягъа тийишли болгъанын эмда аны къалай алыргъа боллугъун а социальный къоруулау аралада сорургъа тийишлиди.