Сынауну, къыйынлыкъны ызындан тынчайыу, женгиллик келликди

Абу Хурайра былай билдиргенди: Мухаммад файгъамбар, Аллахны саламы анга болсун, анга былай айтханды: «Санга хайыр келтирген затда къажыкъмай кюреш, Аллахуталадан болушлукъ тиле эмда сынаула, къыйынлыкъла ючюн артха турма. Бир  заманда да: «Мен  алай неда былай этсем, ма бу тюрлю боллукъ эди», - деме. Андан эсе: «Аллах  алай буйрукъ этгенди. Ол анга керек болгъаныча тамамлатханды», - де. Нек десенг, «алай болса эди» деген шайтаннга кесини аман ишлерин толтурургъа онг береди».

Жашауунда халла тюрлю-тюрлюдюле – сынаулагъа, къыйынлыкълагъа, бушуулагъа да тюбейди адам улу.  Ишде кемчиликле, къоншула бла даулашла, саулукъ осалгъа бурулгъаны, юйюрде дауурла… Аллахуталаны ахшылыгъындан, биз муслийманлабыз. Чыгъанакъны ийнесинден ачысакъ окъуна, аны орунуна саугъа аллыгъыбызны билебиз, тёзюмлюлюк этсек, сабыр болсакъ. Ийманыбыз сыналлыгъын хар бирибиз да ангылайбыз, алай сабырлыкъ, тёзюмлюлюк этер ючюн а адамны ийманы къаты болургъа керекди. 

Ахшы кёллюлюк, игиликни жоралау  энчи берилген фахму тюйюлдю. Адам умутсузлукъну, кёлсюзлюкню хорлап, ахшы умут этерге юйренирге боллукъду.   Муслийман бек алгъа бизни Жаратханнга  ийнаныргъа, анга ышаныргъа керекди.  Аллахутала Къуранда ийманлары болгъанланы къорууларгъа, не къыйын болумдан да къутулууну жолун кёргюзтюрге, ырысхы, аш-суу берирге, къайгъыдан сакъларгъа айтханды. 

Бизни Жаратхан салгъан муратладан артха турмазгъа, тюнгюлмезге юйретеди. «Аллахуталаны рахматлыгъына ийнанмакълыкъны тас этмегиз, жаланда ийманлары болмагъанла тюнгюледиле» (12:87). «Бийикликде болсагъыз, жетишимле этсегиз, кючюгюзню  тас этмегиз, мудах болмагъыз, сиз кертиси бла да ийнана эсегиз» (3:139).

Аны бла бирге уа Аллахутала бушуу, къыйынлыкъ сынагъанланы кёллерин басады, ала сынауладан къутуллукъларына ийнанмакълыкъ береди: «Кертиди, биз файгъамбарларыбызгъа эмда ийманлары болгъанлагъа бу дунияда болушурукъбуз» (40:51). «Кертиди, хар сынауну, къыйынлыкъны ызындан тынчайыу келликди» (94:5).

Муслийман бизни Жаратханны айтханына ишекли болургъа эркин тюйюлдю. Адам жашауда тюбеген къыйынлыкъланы тюзетирге онг болгъанына, аны кюч салып кюрешгени хайыр келтирлигине ийнанмаса, ол Аллахуталагъа ышанмагъанын кёргюзтеди.

Тикаланы Фатима хазырлагъанды. «Ислам в Евразии» газетден.
Поделиться: