Банкланы алдагъандыла

КъМР-де Ич ишле министерствону следствие управлениясы потребитель кредитлени алып, бир ненча миллионну хуржуннга этгенлеге ачылгъан уголовный ишни тинтип бошагъанды. 

 Толу болмагъан шартлагъа кёре, 2013 жылда июльдан 2014 жылда сентябрьге дери кезиуде къауум адам жалгъан документлени хайырланып, юч коммерциялы банкны республикада бёлюмлеринде кредитле алгъандыла – 32 миллион сом.

КъМР-де МВД-ны следствие управлениясы РФ-ни УК-сыны 159-чу статьясына (хыйлачылыкъ) бузукълукъла этилгенлери бла байламлы 32 уголовный иш ачханды. Ала бир материалгъа бирикдирилгендиле. Бу иш бла баламлы 23 адам терсленеди, ол санда коммерциялы организацияланы къоркъуусузлукъ службаларыны къуллукъчулары да.

Тинтиуле бардырылгъан кезиуде криминалист, бухгалтер, къол ызны ачыкълау жаны бла  115 экспертиза бардырылгъанды, документлени  излеу жаны бла 82 иш толтурулгъанды, 25 излеу мадарла, 67 очный ставкала къуралгъандыла. Уголовный ишни кезиуюнде 6,7 минг документ тинтилгенди, 300 адамгъа соруу этилгенди. 

 - Бюгюнлюкде уголовный ишни прокурор къабыл кёргенди эмда материалла Нальчикни шахар сюдюню къараууна берилгендиле,-деп билдиргенди РФ-ни МВД-сыны келечиси Ирина Волк.