Сабийлени сейирлери бла эркинликлери сакъланырча

Бу кюнледе Сюд приставланы Федерал службасыны КъМР-де Управлениясыны башчысы республиканы  баш сюд приставы  Бауаланы Ахмат эмда  сабийлени  эркинликлерин сакълау жаны бла уполномоченныйи Светлана Тлинова гражданланы приёмгъа алгъандыла. Республикада жашагъан къайсы адам да келип, эки ведомствону башчысы бла тюбешип, сорууун берирге боллукъ эди. Приёмгъа келгенлени обращенияларыны бирине да эс бурулмай къалмагъанды, соруулары болгъанлагъа да тынгылы жууапла берилгендиле. 

Чертип айтырчады, быллай тюрлю тюбешиуле дайым да бардырыладыла эмда ала гражданланы  къарыусуз категориялары - сабийлени сейирлерин тамамлаугъа бурулупдула. Дагъыда белгилеп айтырчады, Сюд приставларыны КъМР-де управлениясы ата-анала  борчлу халда  алиментлени заманында  тёлерча этер ючюн кёп тийишли амалланы хайырланыладыла эмда  алагъа не заманда да  аслам  эс бурулады.

Гражданланы приёмгъа алыу  бла байламлы Управленияда ишчи жыйылыула болгъандыла, алада  кётюрюлген сорууланы тамамлауну жоллары туура этилгендиле. Сабийни эркинликлерин сакълау жаны бла уполномоченныйни бла  Сюд приставланы управлениясыны оноучуларыны бирге бардырылгъан  жыйылыулары балаланы жашауларын не къадар тынч, ырахат этер жанына бурулупдула.