Следствие управление

Аманлыкъчы къонакъ

Акъылбалыкъ болмагъан къызчыкъгъа артыкълыкъ этген эр кишиге ачылгъан уголовный иш сюдню къараууна берилгенди.

РФ-ни Следствие комитетини Нальчикде следствие бёлюмюню къуллукъчулары эр кишиге ачылгъан уголовный ишни тинтип бошагъандыла. Ол РФ-ни УК-сыны 131-чи статьясыны 4-чю кесегини «б» пунктуна эмда 132-чи статьясыны 4-чю кесегини «б» пунктуна бузукълукъла этгенине ишеклик барды. Эр киши акъылбалыкъ болмагъан къызчыкъгъа, 14 жыл томагъанын да билип, артыкълыкъ этгенди.

Следствияны шартларына кёре, 44-жыллыкъ терсленнген   2014 жылда ноябрьде Нальчикде эгечине къонакъгъа келгенди. Ол эгечинден туугъан къызчыкъ бла кесинлей къалгъан кезиуде, анга уа жаланда 11 жыл тогъан эди ол заманда, зорлукъ этгенди.  Эр киши эгечинде 2015 жылгъа февральгъа дери  тургъанды эмда бу заманны ичинде аманлыгъын бир ненча кере къайтаргъанды.

Алай артыкълыкъ сынагъаныны юсюнден къызчыкъ анасына жаланда 2020 жылда августда айтханды – эр киши биягъы алагъа къонакъгъа келирге сюйгени белгили болгъанында. Бу шартланы юслеринден тиширыу следствие органлагъа белгили этгенди.

Полициячыны ургъанды 

Черек районда полициячыгъа чабыуул этгенине ишекли инсаннга уголовный иш ачылгъанды.

РФ-ни Следствие комитетини Черек районда бёлюмюню къуллукъчулары РФ-ни УК-сыны 318-чи статьясыны 1-чи кесегине бузукълукъ этгенине ишекли инсаннга терслеу материалла ачхандыла. Ол власть органны келечисине ишчи борчун толтургъан  кезиуде чабыуул этгенди.

Следствияны оюмуна кёре, быйыл 29 сентябрьде 20 сагъатда ишекли Къашхатауда полицияны участка уполномоченныйини сорууларына жууапла берирге унамагъанды. Эр киши кеси да эсирип болгъанды. Ол полициячы власть органны келечиси болгъанын, кесини ишчи борчун толтургъанын ангылагъанды. Болсада аны бла даулашып, бир ненча кере жумдуругъу бла ургъанды эмда формасын жыртханды.

 Уголовный иш андан ары тинтиледи.