Жаш тёлю инновациялы чыгъармачылыкъны арасы къуралгъанды

КъМР-ни, республиканы Экономиканы айнытыу министерствосуну болушлугъу бла Инновациялы чыгъармачылыкъны  «Новатор» даш тёлю  арасы (ЦМИТ) къуралгъанды. Аны юсюнден учрежденияны башчысы Милана Чемазокова билдиргенди. «Аны ишини баш магъанасы -  инновациялы оюмланы жашауда бардырыргъа  юйретиудю», - дегенди ол.

Бу проектни тамамлаугъа ахча «Экономика айнытыу эмда инновациялы экономика» къырал программаны «Гитче эмда орта предпринимательствону айнытыу» деген подпрограммасыны чеклеринде берилгенди. Арада хакъсыз теория эмда практика дерсле бардырыллыкъдыла, 3-D модельлени къурау, 3-D программаланы жазыу, робототехника жаны бла курсла да къураллыкъдыла. Анга деп учрежденияда бийик технологиялы оборудование барды.

Алай бла мында сабийлени  моделированиягъа, программированиягъа, робототехникагъа, техноАртха, ментальный арифметикагъа, ингилиз эмда ана тиллеге юйретирикдиле. Анда playback театр боллукъду, тюрлю-тюрлю мастер-классла, тренингле, кёрмючле эм кёп башха затла бардырыллыкъдыла. Къысхасы, Ара хунерли сабийлени  кёллендирген  жерди. Быллай учрежденияла гитче тёлю илмугъа тартылыр, аланы шёндюгю оборудованияны эмда технологияланы хайырланыргъа онглары болур ючюн деп къураладыла.