Миллет театрланы фестивалы жетишимли озгъанды

Бу кюнледе Грозныйде Миллет театрланы «Федерация»  экинчи Битеуроссей фестивальларыны къууанчлы халда жабылыуу къуралгъанды. Жыйылыу Дагун Омаев атлы дворецде къуралгъанды. Аны бардыргъанла РФ-ни сыйлы артисткасы Ольга Кабо эм РФ-ни халкъ артисти Валерий Баринов болгъандыла. Ары Чечен Республиканы маданият министри Хож-Бауди Дааев, региондан къуллукъчула, хурметли къонакъла да келгендиле.

Тюбешиуню бардыргъанла белгилегенлерича, фестиваль Чеченни Башчысы Рамзан Кадыровну себеплиги бла эки жылны бир бири ызындан мында ётеди. Бу проект энчиди, ол Россей миллет театрлагъа миллет маданиятланы ачыкъларгъа, миллет тиллени даражаларын кётюрюрге болушлукъ этеди.

Жыйылыуда Чеченни маданият министри сёлешгенди.  Ол фестивальны директору Хава Ахмадованы, программа директору Марина Корчакны арымай-талмай кюрешгенлерин, эксперт советни  тийишли ишлерин белгилегенди.  Фестивальны чегинде художестволу совет да спектакльледе, сюзюуледе, мастер-класслада, семинарлада эм чыгъармачылыкъ тюбешиуледе тохтаусуз ишлегенди.

РФ-ни культурасыны сыйлы къуллукъчусу Хава Ахмадова аламат жыр эшитдиргенди, концерт программагъа  А. Шахбулатов атлы Чечен къырал филармонияны, Х. Нурадилов атлы ЧГДТ-ны, «Заманхо» муниципал ансамбльни  артистлери  да къатышхандыла.

Быйыл Миллет театрланы «Федерация»  экинчи Битеуроссей фестивалы жетишимли озгъанды. Энди театр коллективле аны ючюнчю кере бардырылыуун ашыгъып сакълайдыла. Ол да экинчи жыл Грозныйде къураллыкъды.