Качестволу урлукъ бла жалчытыу

Кёп болмай Россейни Эл мюлк министерствосунда  видеоконференция халда селекция эм урлукълукъ жаны бла координация советни  кенгеши бардырылгъанды. Анда баш тема къыралны аграрчыларын тахта кёгетлени  качестволу урлукълары бла жалчытыу болгъанды, деп билдиредиле КъМР-ни Эл мюлк министерствосуну  пресс-службасындан.

 Анга регионлада профильли   ведомстволаны, ассоциацияланы,  илму-излем учрежденияланы таматалары къатышхандыла, ол санда  КъМР-ни эл мюлк министри Хасан Сижажев да. 

Координация советни таматасы  Россейни эл мюлк министрини  биринчи орунбасары Джамбулат Хатуов айтханнга кёре, арт жыллада Къабарты-Малкъарда  тахта кёгетлени производствосу ёсе барады. Болсада аланы ёсдюрюрча асламысында  тыш къыраллы урлукъланы хайырланыргъа тюшеди. 

- Бюгюнлюкде Россейде  селекция эм  урлукълукъ бла кюрешген система хайырланучуланы излемлерин  жалчытыргъа, ол санда  корпорацияла да   жангы   сортла чыгъарырча дайым тири кюреширге керекдиле. Бу жаны бла къырал себеплик этген программала да ишлейдиле. 

Ахырында  регионлада агропромышленный комплексде уруннганлагъа тахта кёгетлени тюрлю-тюрлю сортларын мюлкледе  сынау халда къоркъмай  салып кёрюрлери эсгертилгенди. Аны магъанасы  ахшы тирлик берген, качестволу  эм хауа болумлагъа да чыдамлы  урлукъланы  айырыргъады.