Жаяу жюрюгенлеге жол къоркъуусуз болурча

  Чегем шахарда «Долина Кавказа» жашау журт комплексде жашагъанла къырал машина жолну (шоссени) бир жанына  къыйналып  ётгенлерин КъМР-де битеуроссей миллет фронтну бёлюмюне (ОНФ) билдиргендиле. Ала  жамауатны тарыгъыуун Росавтодорну  автомашина жоллагъа къарагъан «Кавказ» управлениясына жибергендиле.
 

ОНФ-ни келечиси Александр Ордашев айтханнга кёре, жангы микрорайонда кёп фатарлы 49 юй барды. Энтта да 34-сю ишлене турады. Келир заманда былайда  школ эм сабий сад да боллукъдула эм жер юлюшледе  адамла юйле  да саллыкъдыла. Ол себепден шахарда эм машина жолда да  болумну игилендирирча   проектни  заказчиги аны ишин этерге керекди. Алай былайда жаяу жюрюгенлеге переход бла тратуар  ишлерча тыйгъычла  бардыла.

- Жангы микрорайонда жашагъанланы асламысы Нальчикде ишлейдиле, сабийлерин школлагъа, садиклеге жюрютедиле. Аланы кёбюсюню машиналары жокъду, ала кюн сайын автобусха чыгъадыла.  Анга минер ючюн трассаны башха жанына ётерге керек болады.  Аны ортасында къоркъуусузлукъгъа деп ишленнген темир буруу а бютюн да чырмау салады.  

Аллай болум авариялагъа келтирирге боллукъду. Ол себепден жолну башы бла баргъан кёпюр болса бек  иги боллукъ  эди, деп билдиредиле ОНФ-ни келечилери.