Энергетикле къыш сууукълагъа хазырдыла

«Россети Шимал Кавказ» компанияны Къабарты-Малкъарда бёлюмю  къыш сууукълада  «Каббалкэнерго» энергокюч сетьледе аварияла болмазча   ишлени белгиленнген кезиуден алгъа толтургъанды.  Аны чеклеринде специалистле  210 километр чакълы   ток ызлагъа бла 333 10/0,4 киловольт кюч бла ишлеген трансформатор  подстанциягъа мониторинг этип,  керек жерледе  ремонт бардыргъандыла, ол санда 4583 изоляторну  алышхандыла.  Былтыр бу кезиу  бла тенглешдиргенде,  тийишли жумушла   116 процентге кёп тамамланнгандыла.    

Бир-бир ишле планда белгиленнгенден эсе аслам тындырылгъандыла, сёз ючюн, ток чыбыкълагъа тийген терек бутакъланы  40 процентге кёп  кетерирге тюшгенди.   Къауданны  19,86 гектарда кетерирге керек  эди да,  ишле    27,76 гектарда бардырылгъандыла. Эки уллу трансформаторгъа къаралыр орунуна алтысына  ремонт этилгенди.  Ол а,  саулай алып айтханда,  300 процентге кёпдю.  Токну  ёчюлтген механизмлени да  75-си  неда  104 процентинден  асламы жангыртылгъанды.    

- Пандемия бла байламламлы къыйын кезиуге да къарамай,  службала ишлерин  тынгылы  тамамлайдыла. Ала бар керек техника эм  оборудование бла жалтылыннгандыла. Саулукъларына заран жетмезча кюн сайын эс бурулады.  Комплекс халда бардырылгъан  ремонт ишлени хайырындан  быйыл абонентле   къышны бу жаны бла бир тюрлю сылтаусуз  ётдюрюрча боллукъдула,  дейди «Каббалкэнерго» компанияны таматасы Муртаз Каров.