Аслам кёгет сакъланырыкъ жангы база

Кёгетлени сакъларча жарашдырылгъан объектни къурулушу ахырына жете турады. Аны башлагъан «Агрохолод» компаниягъа займны Шимал Кавказны айнытыу  корпорация (КРСК) бергенди. Объект Бахсанда ишленеди эм анга 7 минг тонна продукция сыйынырыкъды. Аны юсюнден КРСК-ны пресс-службасындан Наталья Голянова билдиргенди.

Бюгюнлюкде анга Италияда чыгъарылгъан оборудование салына турады. Къурулушну жылны ахырына бошар муратлыдыла. Аграрчылагъа  ол продукцияны энчи хазырлау амалланы хайырланмай сакъларча  онг берликди. Алмаланы да ёлчемин да  эки кереге кёп этип жыяргъа боллукъду.

Арт 7 жылда республикада 13 минг гектарда алма терекле орнатылгъандыла. КРСК-ны таматасы Андрей Харинни оюмуна кёре, бу къурулуш иелеге продукцияны жылны ичинде тынч-тынч, ашыкъмай сатар онг берликди. Алай бла мында ёсдюрюлген амалланы  жангы регионла бла да келишимле этип, алагъа да тапдырыр онг боллукъду.

Проектни багъасы 578 миллион сомду. Анда КРСК-ны къошумчулугъу 242 миллион сомду,  50 ишчи жер къураллыкъды. Жылны ичинде андан 200 миллион сом хайыр алыр умутлудула.

Таппасханланы Аминат.
Поделиться: