«Кёзбау этмей бир бирден файда тюшерин излемей, таза жюрекден шуёхлукъ жюрюте билиу бюгюнлюкде бек магъаналыды»

Гёжеф Локияланы Жамболат грек-рим тутушууда болдургъан жетишимлери бла белгилиди. Аны биринчи уллу хорламы 2011 жылда Россейни кадетлени араларында биринчилигинде къытхан доммакъ майдалы эди. Эки жылдан ол къыралны юниор биринчиликлеринде кюмюш эм доммакъ майдалланы алгъанды. 2015  жылдан бери Россейни чемпионатларында, Иван Поддубныйны мемориалында алчы жерлеге дайым чыкъгъанлай турады, Европалы, халкъла  аралы, дуния даражалы эришиуледе хорлагъанланы санына кирмей къалмайды. Россейни тутушуудан жыйымдыкъ командасыны баш тренери Гоги Когуашвили аны усталыгъына бийик багъа бичеди, ол умутландыргъан спортчу болгъанын белгилейди.

Жамболат Тырныауузда 1994 жылны 17 декабринде Локияланы Сафарбийни бла Фатиматны юйюрлеринде туугъанды. Бусагъатда республикадан тышында жашайды, жарау этеди. Бюгюн ол бизни ушакъ нёгерибизди.

- Жамболат, сен аты айтылгъан гёжефсе, спортда биринчи атламларынгы эсгерсенг сейир болур эди.   

- Грек-рим тутушуу бла 7 жылымда кюрешип башлагъанма. Бир кесек заманда боксха кёчгенме, анда эки жылны туруп, жангыдан тутушуугъа къайтханма. Эки ай жарау этгенден сора биринчи эришиулериме - Элбрус районну биринчилигине къатышама эм анда экинчи жерни алама. Аны ызындан а республика даражада хорлайма. Боксда эришиулеге жыл саным, ауурлугъум да  гитче болгъаны себепли къатышмагъанма. Гитчелигимден лыжалада учаргъа сюйгенме.

- Сен Къабарты-Малкъарда жашамайса, алай эришиулеге аны атындан къатышаса.

- Хау, эришиуледе туугъан республикамы эм Мордовияны атларындан тутушама. Бюгюнлюкде Мордовия Республиканы Саранск шахарында жашайма. Тургъан жериме кёре юйретген тренерлерими къаууму да тюрленнгенди. Алай биринчи тренерим, тутушууну энчиликлерине биринчи тюшюндюрген, спорт жашаугъа жолуму ачхан а Россейни сыйлы тренери Локияланы Юрий болгъанды, анга дайым ыразылыгъымы билдиреме.

- Биринчи уллу жетишиминге нени санайса?

- 2009 жылда Россейни биринчилигинде (онтёрт жылында – авт.) алтынны алгъан эдим. Андан сора да, кёп тюрлю турнирледе ахшы кёрюмдюле болдургъанма, ол санда Россейни кадетлени араларында биринчилигинде ючюнчю жерге чыкъгъанма. Европаны биринчилигине да баргъанма. Приволжск  федеральный округну жаш тёлю биринчилигинде - эки кере, «А» класслы битеуроссей турнирледе юч кере къытханма, абадан спортсменлени араларында доммакъ призёр болгъанма. РФ-ни спортну устасы деген ат да берилгенди.

Магъаналы эришиулеге Россейни ахыр эки жылда чемпионатларын санайма (алада Жамболат эки жылда да «алтынны» алгъанды. –авт.). Алагъа кючлю спортчула къатышхандыла, хорлам ючюн кюреш къаты баргъанды.

- Аскерчилени араларында дунияны чемпиону болгъанса. Ол эришиуню юсюнден айтсанг эди.

- Аскерчилени араларында спорт тутушуудан  дунияны 33-чю чемпионаты Москваны «Игровой» спорт залында ётген эди. Анга 22 къыралдан  380-ден аслам спортчу къатышхандыла, араларында Олимпиада оюнланы, Еропаны эм дунияны чемпионлары да болгъандыла. Анга Россейни Сауутланнган кючлерини командасыны санында 60 килограммгъа дери ауурлукъда тутушханма.

Алгъа Ирандан къарыулу спортчуну, ызы бла уа Юг Кореядан бла Алжирден гёжефлени, финалда уа Европаны чемпиону азербайджанлы спортчу Мурад Мамадовну хорлагъан эдим.

- Къыралдамы, тышындамы тынчды тутушхан? Кёп спортчула Европада, дунияда эришген алай ауур болмагъанын белгилеучюдюле.

- Баям, къыралда. Мында спортчуланы араларында конкуренция уллуду. Айтханымча, къарыулу, сынамлы гёжефлерибиз кёпдюле.

- Жамболат, спорт жашауунг бла байламлы сен кёп жерде болгъанса, кёп ариу шахарны кёргенсе. Аладан жюрегингде къайсы къалгъанды, жангыдан къайтып турлугъунг къайры келеди?

- Хар жерни да кесини энчилиги, башхалада тюбемеген ариулугъу барды. Алай къайтыргъа уа жангыз да туугъан шахарыма Тырныауузгъа, юйюме келеди. Жарсыугъа, юйдегилерими терк-терк жокъларгъа заман чыкъмайды. Жылгъа бир кере эки ыйыкъгъа келалсам да, ахшыды.

Мында болгъан заманларымда школубузгъа да къайтыучума, Тырныауузну 3-чю номерли мектебин бошагъан эдим, аман окъумагъанма. Устазларымы барысын да сюеме, эсимде тутама.

- Жамболат, спорт адамдан аслам къарыу, саулукъ да излейди. Анда уллу  болжалгъа къалыргъа кёплени къолларындан келмейди. Андан тышында билиминг, усталыгъынг а бармыды?

- Алгъа Мордовиялы къырал университетни Педагогика институтуну физический культура эм спорт факультетин тауусханма, тренер болаллыкъма, ызы бла юридический жаны бла да усталыкъ билим алгъанма.

- Социальный сетьледе суратларынга къарагъанда, тенглериг кёп болгъаны эсленеди.     

- Командабыз кёп миллетли болгъаны себепли, регионланы асламысында шуёхларым бардыла. Биз бир бирибиз бла байламлыкъла дайым тутабыз, болушлукъ керек болса, мычымай къолдан келгенни этерикбиз. Мен ойлагъандан, адамлада эм магъаналы шартла кертичилик, кёзбау этмей бир бирден файда тюшерин излемей, таза жюрекден шуёхлукъ жюрюте билиудю.

- Жамболат, ушагъыбызны ахырында тёрели соруу – алда къаллай муратларынг бардыла?

- Сентябрьни биринчи жарымында юйрениу-жарау этиу жыйылыуларыбыз боллукъдула, алагъа барлыкъма. Бусагъатда баш борч къарыу жыяргъа, алгъыннгы низамгъа къайтышыргъады. Пандемияны хатасындан алыкъа къаллай эришиуле боллугъу белгисизди, ахшы жангылыкъла сакълайбыз.