Къачып къутулургъа умут этгенди

Жолда сабийни басдырып, авария болгъан жерден къачып къутулгъан водитель 15 кюннге тутулгъанды. 51-жыллыкъ эр кишини солууунда  ичгини ёлчеми эркин этилгенден алты кереге кёп болгъаны тохташдырылгъанды.

 Быйыл 21 октябрьде 12 сагъатда Чегем районда полицияны бёлюмюне сабий жолда ачыгъаныны юсюнден билдириу келгенди. Белгисиз водитель акъ машинада Чегем-2 элде Ленин атлы орамында 8-жыллыкъ къызчыкъны басдырып, алайдан къачып къутулгъанды. Сабий жолдан ётерге эркин этилген жерден 20 метр узакълыкъда баргъаны тохташдырылгъанды. Ол саулукъ сакълау учреждениягъа жетдирилгенди.

Жолда жюрюуню къоркъуусузлугъу жаны бла инспекторла бла уголовный розыскны полициячылары, тийишли излеу жумушла толтуруп, бир ненча сагъатны ичинде аварияны этген адамны тапхандыла. Ол 51-жыллыкъ эр кишиди.

Медицина тинтиуле бардырылгъанда, аны солууунда ичгини ёлчеми эркин этилгенден 6 кереге кёп болгъаны ачыкъланнганды. Анга РФ-ни КоАП-ыны 12.27-чи статьясыны 2-чи кесегине кёре административ материалла ачылгъандыла. Ол авария этип,  аны хатасындан ачыгъан адамгъа болушлукъ этмей, къачып къутулгъаны ючюн терсленеди. Бу шартланы Чегем районну жарашдырыучу судлары тинтип, эр кишини 15 кюннге тутаргъа деген оноуну чыгъаргъандыла.

Андан сора да эр киши РФ-ни КоАП-ыны 12.27-чи статьясыны 3-чю кесегине  кёре да терсленеди. Ол жолда жюрюуню жорукъларына бузукълукъ этип, авариядан сора ичги затланы хайырланнганы ючюн терсленеди. Быллай бузукълукъ ючюн аны машинаны жюрютюрге эркинлиги эки жылгъа сыйырылыргъа боллукъду. Документлени тинтгенде  эр киши ОСАГО полисге жазылмагъаны да ачыкъланнганды. Аны ючюн а тазир салыныргъа боллукъду.

Аварияда ачыгъан къызчыкъны саулугъуна къоркъуу жокъду. Медикле тийишли тинтиуле бардырып, аны юйюне ашыргъандыла. Инспекторла анга жолдан жаланда эркин болгъан жерде барыргъа жарагъанын ангылатхандыла. Аны атасына бла анасына уа сабийге сакъ болурларын эсгертгендиле.

 КъМР-ни прокуратурасындан бизге билдиргенлерича, бу жол-транспорт болумну сылтауларын тинтиу контрольгъа алыннганды, керек болса, прокурор эсгертиуле чыгъарыллыкъдыла.