Рапс былтырдан эсе 3,5 кереге кёп себилликди

Быйыл Къабарты-Малкъарда кюзлюк рапс  3,5 минг гектаргъа себилликди, былтыр бу заман бла тенглешдиргенде, ол 3,5 кереге кёпдю, деп билдириледи КъМР-ни Эл мюлк министерствосуну пресс-службасындан.

Бюгюнлюкде мюлкледе  рапсны чачып бошай турадыла. Ол ёсген жерде бирси мирзеулю ёсюмлюлюкле, ол санда нартюх,  аламат битеди эм бай тирлик береди.  

  Специалистле белгилегенлерича, рапс жерни иги жумушатады, ол себепден  семиртгичлеге артыкъ  къоранчла  этерге тюшмейди. Аны бла бирге   жауун халда суу сугъаргъан установкаланы  хайырындан сабанлыкълада бир сезоннга эки тюрлю культураны ёсдюрюрча  онг барды.  Эсге сала айтсакъ,   арт заманда рапсха сурам дайым  ёсе барады.  Жер жюзюнде  аш-азыкъ эм мал аш хазырлауда  пальма бла сояны жауларындан сора аны хайырланадыла.

   «Халкъла аралы кооперация эм экспорт» миллет проектге кирген «Агропромышленный  продукцияны экспорту» къырал программагъа кёре, къоранчланы  бир кесегин къыралны болушлугъу бла жабаргъа боллукъду.   Ол шарт республикада   расп бла сояны производствосун  ёсдюрюрча ахшы онг тапдырлыкъды.   

Маготмеланы Сулейман.