Борчларын офисден тышында толтургъанланы эркинликлери сакъланыллыкъды

Къырал Думаны спикери Вячеслав Володин эмда Федерация Советни башчысы Валентина Матвиенко Россейде ишчи борчланы офисден тышында бардырыуну (удаленный халда)  юсюнден законну проектин парламентарийлени къарауларына бергендиле. Бюгюнлюкде къыралда юйлеринден ишлегенлени эркинликлери, бу амалгъа кёчюуню низамы законлада белгиленмегендиле. Закон бу кемчиликни кетерирге, борчларын офисден тышында толтургъанланы эркинликлерин сакъларгъа болушурукъду  деп акъыл этедиле документни авторлары.

 «Пандемия урунуу законодательствода кемчиликлени ачыкълагъанды. Ол санда урунуу болумлада информация-коммуникация технологияланы онглары тергелмегендиле»,-деп айтылады законопроектни ангылатыу кесегинде.

Бюгюнлюкде РФ-ни Урунуу кодексине жаланда «дистанциялы амал» деген ангылам кийирилгенди. Анга уа проектни авторлары «болжаллы халда дистанциялы амал бла (удаленный халда) урунуу» дегенни къошаргъа дейдиле. Алай бла уа къыралны инсанлары ишчи борчларын офисден тышында толтурургъа эркин боллукъдула. 

 Матвиенко бла Володин кёргюзтген эсгертиуледе   бу мадарны юч тюрлю сылтау бла кийирирге жарагъаны белгиленеди – эки жаны да келишим этселе, производствогъа керек заманда  неда аллындан белгили болмагъан халланы кезиуюнде.

 Закон къабыл кёрюлсе, дистанция амал бла уруннганланы ишден къыстагъан къыйыныракъ боллугъун айтадыла экспертле. Бюгюнлюкде РФ-ни Урунуу кодексинде белгиленнгенича, иш бериучю ишчини къуллугъундан  урунуу келишимге тийишлиликде эркин этерге боллукъду. Башхача айтханда, иш жетмейди дегенча сылтауланы айтып. Алай законну авторлары ол низам уруннган адамны эркинликлерин бузгъанын айтып, аны кетерирге предложение этгендиле.

Офисден тышында уруннганлагъа ишчи заман да тохташдырылады. Андан башха кезиуде таматасы сёлеширге, буйрукъла берирге эркин боллукъ тюйюлдю. Бу жорукъ сакъланмаса уа, ишчи борч  артыгъы бла толтургъаны ючюн къошакъ ахча тёленирикди.

Къыралда предприятияланы, организацияланы келечилерине   юйлеринден коронавирус бла байламлы ишлеп башларгъа тюшгенин белгилерчады. Карантин ючюн кийирилген тыйгъычла кетерилип башлагъанлары бла офисле аз-аздан адамладан толуп тебирегендиле. Алай бир-бир регионланы власть органлары, онг болгъанына кёре, энтта удалённый халда ишлерге чакъырадыла.

Карантин башланнган кезиуде къыралны инсанларыны асламы юйлеринден ишлерге тюшгенине артыкъ бек бюсюремегенлерин ачыкълагъан эдиле тинтиуле. Апрельде соруугъа къатышханланы  жаланда 22 проценти анга ыразы болгъанларын билдиргендиле.   Хар ючюнчю инсан юйде эсин жыйып, низамлы болалмагъанына тарыкъгъанды. Башхалары уа юй жумушланы бла ишчи борчланы юлешалмагъанларын билдиргендиле.

Алай июньда бардырылгъан соруу хал тюрленнгенин ачыкълагъанды. Тинтиулеге къатышханланы жартысы юйден ишлегенлерин жаратханларын айтхандыла. Алай суралгъанланы 16 проценти анга энтта юйреналмагъанларын билдиргендиле.