Предпринимательлеге социал сетьледе онг табаргъа болушадыла

«Иш кёллю Россей» жамауат организацияны бизни республикада бёлюмюнде предпринимательлеге деп маркетинг жаны бла онлайн мастер-класс бардырылгъанды. Анга къатышханланы товарларыны эмда жумушларыны юсюнден социал сетьледе кёргюзтюрге юйретгендиле.

Мастер-классны Тамбийланы Мадина къурагъанды. Ол сынамлы маркетологду, деп белгилегендиле организацияны пресс-службасында. Аны компаниясы ахыр тёрт жылны ичинде социал сетьле бла байламлы жюзден артыкъ проект тындыргъанды.

Мадина предпринимательлеге шёндюгю интернет берген амалланы, анда аланы ишлерини юсюнден кёплеге билдирирге, бирсилени сынамлары бла шагъырейленирге боллугъуну юсюнден хапарлагъанды. «Социал сетьлеге келишмеген бир бизнес да жокъду бюгюнлюкде. Аны къолгъа алалмагъанланы уа асламысында ангылаулары болмайды неда билимлери жетишмейди», - дегенди ол.

Маркетолог къыз рекламаны, Фейсбукну эмда Инстаграмны ишде хайырланыуну, контент жарашдырыуну юсюнден хапарлагъанды, соруулагъа да жууапла бергенди. «Алагъа керекли аберигиз болмаса, ишигиз айнырыкъ тюйюлдю. Сизни аккаунтха къадар адам къарагъандан хайыр жокъду; сатхан товарыгъызгъа неда берген жумушугъузгъа сейирлери болгъанланы излерге керекди», - деп, баш жерге алыучуланы излемлерин салыргъа чакъыргъанды.