Къармашыулу адамны къолундан не да келеди

Репортаж

Гуртуланы Ибрагим Хабазны къатында мюлк къурагъанды. Ол анда малла тутады. Ол къошну къурагъанлы жылдан артыкъ болады. Айтханына кёре, ары дери ол тийреде башха адам къойларын тутханды. Ибрагим а аны андан сатып алгъанды.

Къош энди аякълана баргъаны кёзге урунады. Ушакъ нёгерибиз да,  берилмеген сорууубузну сезген этгенча: «Мында энтта да этер иш кёп болгъанын кесинг кёресе. Алгъаракълада малчыла турурча юйчюкню къабыргъаларын къалап, башын да жабып бошагъанбыз. Ары дери вагончукъда кечинирге тюшгенди. Энди уа аны кетерип, ол бирине кёчерикбиз. Аны хайыры бла арбаз да эркинирек боллукъду», - дегенди. «Мал орунла да алгъын иеден къалгъандыла. Шёндю ала жетишедиле, алай келир заманлада уа азлыкъ этерикдиле. Ол себепден кёпге да созмай аланы иги да кенгертирге керекди», - деп къошханды.

Гурту улу ишин онбеш сауулгъан ийнекден башлагъанды. Жыл да озгъунчу,  малланы санын жетмишге жетдиргенди.  Бугъала, къунажинле, бузоула да бардыла. Жууукъ кезиуде мюлкде талай ийнекден тёлю сакълайдыла. Саулай айтханда уа, малланы санын жюзге жетдирирге умут этедиле.
Сауулгъан сютню тюзюнлей алыучулагъа ашырадыла. «Бара-баргъанда  жау, бишлакъ да этип башларгъа  болурбуз, алай бюгюнлюкде аны бла кюреширге  онг жокъду», - деп къошханды Ибрагим.

Быллай бир малны къышда кечиндирген тынч болмагъаны баямды.  Къош башчы да аны къайгъысын аллындан окъуна этгенди. Ёзенде элледен ташып, къошну жанында саламдан жюзден артыкъ чулгъам жыйгъанды. Салыр жери болмай тургъаны себепли, жашагъан юйюню къатында да биченден  къыстырыкъ этгенди. Талай замандан а къошну къатында бичен орун ишлерикди. Биченни Ауар - Сыртда комбайн бла процентге (эки тенг этип) чалып, алай ташыйды.

«Нартюхден бир он тонна чакълы алсакъ, жете кетерикди. Къышхырсыз да боллукъ тюйюлдю. Дагъыда онгубузгъа кёре арпадан да къыстырыкъ этерге кюреширикбиз. Бир игиси – къышда малланы орунда бегитип турмай, тышына жиберирге онг барды; ала къаудан бла жубана, кеслерине отлар зат мажарадыла», - деп къошханды ол.

Ибрагимге жашы Руслан болушады. Ол эл мюлк техниканы тынгылы биледи, къайсы тюрлюсюн да хайырланалады. Заманы болса,  алагъа киеулери да билеклик этеди. Айтханыбызча, шёндю къошда бир ишчи барды, алай Гурту улу билдиргеннге кёре, мюлк айныгъаны бла энтта да адамла керек боллукъдула.

Ишчиси Аслан къошда халгъа ыразыды. «Башын тутаргъа сюйгеннге, эринмей-талмай урунургъа хазыр болгъаннга мында бек кёп амал барды. Ибрагимге да сёз айтырча тюйюлдю,  ол огъурлу,  башханы  къыйынына багъа бере билген  адамды», - деп чертгенди.

Гуртуланы Ибрагим ал жыллада къырал ишледе да къармашып тургъанды.  Бир кезиуледе Малканы суу мюлкюнде тракторчу эмда сварщик болуп да уруннганды. Пенсиягъа чыкъгъанындан сора уа  малла бла тынгылы кюрешип тебирегенди. Къармашыулу, къолундан келген адам болгъаны кёзге урунады. Биз анга тутхан ишини хайыры ёсюп, мюлкю да айнып, айтхылы болурун тежейбиз.