Бетлерин огъурлулукъну нюрю жарыта

Дунияны башында хар инсаннга да жюрек тынчлыкъдан уллу насып болмаз. Аллай насыпны уа адам улу эм алгъа, айхай да, кесини юйюрюнде табады. Къайсы бирибиз да къууаннган чакъларыбызда, къыйын кюнлерибизде да бек биринчи таянчакълыкъны, ачыкъ ниетлиликни, жан жылыуну, сюймекликни да анда сезебиз. Къудурет инсаннга берген эм уллу байлыкъ да ол болгъанын ангылайбыз.

Уллу эм ариу эллерибизден биринде –Кёнделенде – жашагъан Бапыналаны Сагид бла Ногъайлыланы Разият да юйюр къыйматлагъа энчи эс бургъанлай, намыс болгъан жерде насып да таркъаймагъанлай турлугъуна ийнана, жамауат ичинде хурметге, сыйгъа да тийишли бола келедиле. Бюгюнлюкде бу огъурлу адамла энди абадан тёлюбюзге къошулгъандыла. Юйюр тамата, къудуретни ахшылыгъындан, быйыл кесини 80-жыллыкъ юбилейин да белгилейди.

Андан сора да, жаланда аланы кеслерини угъай, ёсдюргенлерини, туудукъларыны да уллу къууанчлары уа ала юйюр къурагъанлы 50 жылдан атлагъаныды. Айхай да, биз къайсы бирибиз да ангылайбыз ол къаллай бирге дери насып болгъанын. Къадар аллай жазыуну хар кимге берип да къоймайды.

Анча заманны ичинде аланы къыйын, тынч кюнлери да кёп болгъандыла. Алай эсе да, не кезиуде да жюреклери этген сайлаугъа, сезимге кертичилей къалгъандыла. Халал къыйынлары, таза ниетлери бла ариу эм шуёх юйюр да ёсдюргендиле.

Бапына улу гитчелигинден да окъургъа итиннгенди, бийик билим алыргъа сюйгенди. Кесини ол муратын толтура, школну ахшы тауусханындан сора КъМКъУ-ну инженер-къурулуш факультетине киргенди. Аны жетишимли бошап, Тырныауузда кёп жылланы бет жарыкълы ишлегенди. Артда уа СКЭП-ни Кёнделендеги цехлерине таматалыкъ этип да тургъанды. Бюгюнлюкде сексен жылгъа жетгенине да къарамай, тириди. Юйде малгъа, бирси жумушлагъа да къарайды.

Алай а аны сабийлигинден да сюймеклиги китапладыла. Бусагъатда да суратлау чыгъармаланы окъургъа угъай демейди. «Заман» газетибизни да эм хурметли окъуучуларындан бириди. Анда эллерибизде жашагъан адамларыбызны юслеринден билирге бегирек сюеди.

Ол юйде уллу библиотека да жыйышдыргъанды. Китапла табылмагъан кезиуледе окъуна аланы жаздыртып, почта бла алып тургъанды. Тарых бла байламлы изданиялагъа бютюнда уллу эс бурады.

Разият Ханапиевна уа, юйюрню анасы болуп къалмай, элни Доттуланы Ахмат атлы школунда кёп жылланы устазлыкъ этип келеди. Педучилищени тауусханындан сора аслам тёлюню харф таныргъа, жазаргъа да юйретгенди. Бусагъатда да ол иш юсюндеди. Шёндю сагъынылгъан мектепде труд дерсни окъутады. Кеси къолдан уста тиширыу сабийлени накъышланы, оюуланы хар тюрлюсюн сала билирге, эшерге, машина бла тигерге, пластилинден, башха затладан да абериле этерге тюшюндюреди. Усталыгъына тийишлиликде бийик категориясы да барды.

- Атабыз китап окъургъа сюйген, аны излегенлей тургъан интеллектуал эсе, анабыз таза да ишине берилген чынтты педагогду. Кеслерини ол ышанларын, къол хунерлерин а ала бизде да сингдиргендиле, - дейди къызлары Асият огъурлу инсанланы юслеринден.

Ала тёрт сабийлерин да не заманда да кеси къыйынлары бла жашаргъа, окъууну магъанасына да юйретгендиле. Барысы да бийик билим алып, бирери бирер жерде ишлейдиле. Таматалары Алим Нальчикни тогъузунчу номерли школуну завучуду. Андан сора да, мында ОБЖ-дан дерсле береди. Мурат налог инспекцияны бёлюмлеринден бирини башчысыды.

Аминат да аналарыны жолун сайлагъанды. Ол химиядан методистди. Асият а таныулу врачды. Бюгюнлюкде республиканы сабий клиника больницасыны консультация-диагностика поликлиникасыны таматасыды. Нальчикде «Доктор Смит» клиникада да ишлейди.

Алай эсе да, ата-анагъа эм уллу къууанч – ала туудукъладыла. Насыпха, жашла-къызла да юйдегили болгъандыла. Бусагъатда онбир туудукъ да аппаларыны бла ынналарыны ийнакъларыдыла. Аланы таматалары Улбашланы Омар бюгюнлюкде Москвада И.М.Сеченов атлы биринчи къырал медицина университетни тёртюнчю курсундады. Арина да, быйыл «Кюн шахар» сабий чыгъармачылыкъ академияны жетишимли тауусуп, къарындашчыгъыны жолун сайлагъанды. Бирсичикле уа алыкъа кими-школгъа, башхасы садикге жюрюйдюле.

Къудуретни кючю уллуду. Ол кесини ажайып базманында насып деген ангыламны кимге къаллай бир ёнчелеп берлигин бир инсан да билмейди. Болсада биз бюгюн хапарын айтхан юйюрге къадар аны къызгъанмагъаны баямды, шукур. Мында таматала кичилени жаланда сёзлери бла угъай, кеслерини ариу къылыкълары бла да юйрете келедиле. Ол ышан а миллетибизде ёмюрледен да сакъланнганлай баргъаны кёллендиреди.

Къайсы юйюрде да эм уллу насыпха аны адамларында болгъан шуёх сезим саналады. Ата-ананы, къарындаш-эгечни арасында ол бар эсе, жууукъла, тенгле да аланы башхача кёредиле, хурметлейдиле. Биз бюгюн хапарын айтхан юйюрде да, насыпха, бир бирге бек сакъдыла. Таматаланы терк-терк жокълагъанлай, барысыны да жетишимлерине бирден къууаннганлай, бир бирге билеклик этерге ашыкъгъанлай жашайдыла. Аланы ол ышанларын а бирсиле да эслейдиле, юлгю алыргъа сюедиле, алагъа ушаргъа итинедиле.

Россейде Юйюрню, сюймекликни эмда кертичиликни кюнюн белгилеу, билгенибизча, эрттеден бери да ахшы тёре болгъанды. Бу байрам бла байламлы уа хурметли юйюрлеге «За любовь и верность» деген майдал да берилиучюдю. Быйыл аллай саугъагъа Бапыналаны  Сагид бла Разият да шуёх юйюр ёсдюргенлери ючюн тийишли болгъандыла.

Ала насыпха биригиулюкню, бир бирни сёзюне, оюмуна тынгылай билиуню санайдыла. Бу юйюр жашаугъа, къадаргъа да ыразы бола, эллерин, миллетлерин айнытыугъа да тийишли юлюшлерин къоша, бетлерин огъурлулукъну нюрю жарытханлай жашайдыла.

Мокъаланы Зухура.
Поделиться: