Энчи налог тёлеп тебирерге чакъырадыла

Бир тюрлю иш къурап, файда тюшюрюп башлагъан инсанланы быйыл биринчи июльдан башлап энчи налог (НПД) тёлеп тебирерге чакъырадыла. Быллай оноуну адам кеси этерге керекди, ол борчха саналмайды, дейдиле КъМР-де МФЦ-да.

Бу налогну ставкасы артыкъ уллу тюйюлдю. Товарланы адамлагъа сатханда неда алагъа жумушла тапдыргъанда – 4, предпринимательлеге эмда предприятиялагъа бла организациялагъа уа   6 процентди. Айтханларына кёре ала он жылны ичинде тюрлендирилмей турлукъдула.

Быллай налог низамгъа  ишчиле тутмай кеслери абери бла кюрешип файда тюшюргенле кёчерге боллукъдула. Саудюгерчиле, акциз тёленирик товарланы эмда жер тюбюнден чыгъарылгъан байлыкъланы сатыучула, башха предпринимательге келишим къурап ишлегенле да ары кирмейдиле.

НПД-ны «Мени налогум» деген приложенияда сайларгъа боллукъду. Тергеулени бары да автоматика халда бардырыладыла. Налог тёлеучю жаланда хар ахча тюшген сайын  чек жарашдырыргъа керекди.

Бу налог бир жылны ичинде тюшюрюлген файданы ёлчеми 2,4 миллион сомдан атлагъынчыгъа  дери тёленеди. Андан сора уа башха низамлагъа  кёчерге тюшерикди.

Быллай тёлеу низам  не бла игиди десе, биринчиден - налог декларацияла, отчётла берирге керек болмагъаны бла. Дагъыда: аны ставкасы азды, контроль-касса техниканы хайырланыргъа керекмейди. Чеклени эмда тюшюрюлген файда бла байламлы справканы да сагъынылгъан приложение жарашдырады. Пенсия фондха страховой тёлеулени предприниматель кеси береди. Соруулары болгъанла Федерал налог службаны бирикген номерине сёлешсинле: 8-800-222-22-22.