Банкны атындан хыйлачы сёлешсе

Адамланы телефонларына селешген хыйлачыла къалай алдатыргъа кюрешедиле? Анга Россейни Банкыны Къабарты-Малкъарда бёлюмюню башчысыны орунбасары Балаланы Расул жууап бергенди:

«Бюгюнлюкде кибер аманлыкъчыла бизни телефон номерлерибизни кёп техникалы амалла бла билирге боллукъдула. Алай болса,  алагъа банк номерлерибиз да ачыкъ боладыла. Къайсы бирибизге да атыбызны, тукъумубузну айтып сёлашаллыкъдыла ала, карталарыбызны номерлерин, ала не заманнга дери хайырланыуда  болгъанларын да билликдиле. Хыйлачыла информациялы араны тауушун къошуп да сёлешедиле. Алай бла биз алагъа ышанырча этедиле.

Адам кече ортасында неда эрттенликде терк эс жыялмагъанын билип, бу заманлада сёлешедиле. Сёз ючюн, бизни картабызны ким эсе да хайырланады  деп къоркъутадыла. Аны номерин жиберигиз дейдиле. Алай болса,  биринчиден,  сёлешгенни атын, тукъумун, къайсы банк бёлюмде ишлегенин соругъуз. Ызы бла кечирек сёлеширбиз деп, телефонну салыгъыз, банк бёлюмге кесигиз сёлешигиз.

Банкны тюзюнлей номери картаны юсюнде жазылады. Белгисиз номерлеге сёлешмегиз, билдириуле да жибермегиз. Финанс учрежденияны эм аны бёлюмлерини жаланда официальный номерлерин хайырланыгъыз. Дагъыда терк оноу этерге ашыкъмагъыз. Банкда сизни картагъыз бла хыйлачы кюрешгенин эслеселе, аны бла операцияла эки кюннге тохтатыладыла. Ол кезиуде учреждениягъа кеси оноуубузну билдирирге керекбиз. Къайтарып эсгертейик: банк карталаны номерлерин бир кишиге билдирирге жарамайды».