«Сахнагъа чыкъсам, малкъарлы къыз болгъанымы, атам-анам къалай къарарла дегенни бир заманда да унутмайма»

Сахнагъа кертичи болгъанла, сахнаны экинчи юйлерине санагъанла жашауларын толусунлай анга жоралайдыла. Аллай къызларыбыздан бири жаш артистка Гергокъаланы Халиматды. Биз аны бла ушакъ этип, кёз къарамларын билирге излегенбиз.

- Халимат, тёрели соруу: жыргъа, оюннга сюймеклигинг неден башланнганды?

- Ол къадар манга тежеген жол болгъанына толусунлай ийнанама. Школгъа  беш жылым толгъанда барама. Асыры гитчеди деп, алыргъа унамай, артда аппам туугъан эли Огъары Малкъарны мектебини  таматасы Жангоразланы Борис бла сёлешип, алай бла окъуп башлайма. Билемисиз, мени, бирси сабийледеча,  биринчи сентябрьде байрамым окъуна болмагъанды (кюледи).

Устазым Баллиланы Роза бек аламат, сейир адам, ол кеси да чыгъармачылыкъ бла кюрешгенлей, бизни да ол жаны бла юйретгенлей тургъанды. Шахарда спектакльлеге, культура жаны бла байрамлагъа да келтирирге, школда да жырла, макъамла юйретирге, башха жаны бла фахмубузну да ачыкъларгъа билимин, къарыуун, заманын да аямагъанды.

Аны къап-къара базыкъ дефтеринде аллай бир жыр жазылып эди.  Андан аланы алып айтханым а Роза Баразовнаны алай къууандыра эди. «Сени фахмунгу айнытыргъа керекди», - деп кёп кере кёллендиргенди. Сау болсун, эслеп, тюз жолгъа салгъаны ючюн.

- Алай бла сен СКГИИ-ге киресе, анда уа кимни классында окъугъанса?

- Энтта да жазыуну юсюнден айтайым. Ол мени жашау жолумда къуруда аллай огъурлу адамла бла тюбетгенлей тургъанды, кёз тийдирирге окъуна къоркъама. Белгилисича, ЮФО-ну бу жаны бек айырмалы педагогларындан бирине  Валерий Кайцуков саналады. Вокал бёлюмге келгенимде, аны студиясына тюшерге насыбым тутады.  Экинчи курсдан башлап, Текуланы Махмутда бла Наталия Гасташевада окъугъанма. Алай Кайцуков бла байламлыгъымы юзмей, анга келип, юйренип тургъанма.

Окъугъан заманымда институтда Къулбайланы Людмила, Жанатайланы Исмайыл да ишлегендиле, ала бла тюбешиуле да эсимде жарыкъ эсгериулеча къалгъандыла. Таукенланы Галинаны дерслерине да тынгылагъанма.  Ол мени бюгюнлюкде да адамлыкъ шартлары, жумушакълыгъы, тиширыу сюйдюмлюлюгю бла сейирге къалдырады.

- Окъууунгу бошагъандан сора Музыка театргъа келесе  да?

- Хау, устазым Валерий Аслановични хайырындан. Ол тёртюнчю курсда студентлени Музыка театрны ишине тири къатышдырып тебирейди. Алай бла аны хоруна къошулама. Анда мен  концертлеге, жомакъ оюнлагъа къатышама. Роман Дабагов бла «Валида» деген мюзикл проектде биринчи уллу ишим болгъанды.

Алай бла режиссёр Тамара Сафарова бла да ишлеп тебирейме. Ол мени, концертлени бардырыргъа юйретип, сахнагъа терк-терк чыгъаргъанды, ызы бла театрны солистлерине къошханды.  Анга да бек ыразыма, бюгюнлюкде сахнагъа къоркъмай чыкъгъанымда, аны уллу къыйыны барды.

- Халимат, сен кесинг а макъамла жазамыса?

-Жазама, алай алыкъа кишиге кёргюзтмегенме, ала кёбюсю романс жанргъа тартадыла. Не десек да, классика билимим кесин билдирмей, бу ызгъа бурмай къоймайды. Келир заманда, ким биледи, аланы тап халгъа келтирип, тынгылаучуланы къууандыралырма деп ышанама.

- Къулийланы Къайсын атлы Малкъар къырал драма театрны актёр къауумунда болгъанса. Ары къалай келген эдинг, къуралгъан, эрттеден бери ишлеген сынамлы коллективге санга, жангы адамгъача, къошулгъан къыйынмы  эди?

- Аны башчысы Жангуразланы Мажит, театргъа бир кесек хайыр келтирлик адамны эслесе, аны ары тартмай къоймайды. Ол,  бизге кел да, кесинги драма актрисача сынап бир кёр деп, Атмырзаланы Магомет салгъан «Ревизор» спектакльде Лука Лукични юй бийчесини ролюн бергенди. Фахмулу режиссёрубуз Къулийланы Борис Мольерни «Тартюфун» салгъанды, анда Марианнаны сыфатын къурагъанма.

Борисни юсюнден тынгылыракъ айтыргъа сюеме. Ол, репетициялада бир заманда да ауазын кётюрмей, актёрланы салгъан муратына тынч, сабыр жол бла элтгенди. Анда гурушхалыкъ, кёлкъалдылыкъ дегенча сезимле ахырысы бла да жокъ эдиле.  Актёр ангыламай эсе, ол эрикмей, арымай-талмай къалай этерге кереклилигин юйретгенлей тургъанды. Аны тили да, профессионалдача, шатык эди, кёз къарамлары да сейир, энчи.

«Тартюфну» застольный ишин бардыргъаныбызда, ол бизге онжетинчи ёмюрде адамла къалай жашагъанларын, ала кеслерин къалай жюрютгенлерин, не ашагъанларын, къалай кийиннгенлерин  ачыкълагъанды. Спектакльни салгъан кезиуде анга ууакъ, бу уа кёзге урунурукъ тюйюлдю дегенча затла ахырысы бла да болмагъандыла.

Коллективни абадан, жаш къаууму бла да тынч келишгенме. Ала барысы да ишлерин билген, жарыкъ адамла болгъанлары себепли.

- Таулу тиширыугъа сахнада къыйынмыды?

- Миллет театрларыбызны, миллет жыр искусствобузну алсакъ, къаллай бир фахмулу артистка ёз  жашауларын сахнагъа къуллукъ этиуге  бергендиле. Тынчмы, къыйынмы эди алагъа – айталмайма, алай быланы харкюнлюк ауур ишлери аслам заманларын алгъаны уа, баям, кишиге да жашырын тюйюлдю.

Алгъыннгы тиширыуларыбыз, сёзсюз, бир-бир кёз къарамладан толусунлай ычхыналмагъандыла. Алай мен анга осалды деп айталмайма. Ол заманда сахна тазаракъ болгъанды, бусагъатда уа  шоу-бизнесни кемчиликлери къошулуп, кёп затны буза барады.

Мен кёп коллегаларым бла ушакъларымы башхала бла тюбешиулеге алышындыраллыкъ тюйюлме. Нек дегенде бу адамла бек сейирдиле, энчи оюмлары, айырмалы, бирсилеге ушамагъан кёз къарамлары, бай ич дуниялары болгъаны себепли.

Сахнагъа чыкъсам, малкъарлы къыз болгъанымы, атам-анам къалай къарарла дегенни бир заманда да унутмайма, ол манга чырмаулукъ этеди деп да билмейме. Бирле сен ачыкъ жыйрыкъла нек киймейсе, деп да сорадыла (кюледи). Мен акъыл этгеннге кёре уа, юс кийиминг угъай, жюрегинг ачыкъ, жалан  болургъа керекди. Олду бек къыйыны бизни ишибизде.