Цифралы эм гуманитар усталыкълагъа аслам эс буруллукъду

Кёп болмай Герпегежни орта школунда  "Точка роста"  цифралы эм гуманитар ара ишлеп башлагъанды, деп билдиредиле Черек муниципал  районну пресс-службасындан.

Аны ачылыууна КъМР-ни жарыкъландырыу, илму эмда жаш тёлюню ишлери жаны бла министри Анзор Езаов, орунбасары  Екатерина Мисостова,  билим бериу управленияны таматасы Марина Мизова, Черек районну администрациясыны таматасыны биринчи орунбасары Глашланы Артур, муниципалитетде  билим бериу эм жаш тёлю политика  жаны бла управленияны таматасы Эфендиланы Тареза, школланы келечилери, ата-анала  эм башхала  къатышхандыла.    

Ара «Билим бериу» миллет проектге кирген «Бюгюннгю школ» федерал программаны чеклеринде къуралгъанды. Аны магъанасы окъуучуланы   технология, математика бла информатика, къоркъуусуз жашау бардырыуну мурдору (ОБЖ) эм башха предметледен билимлерин ёсдюрюргеди.  Мында жангы интерактив комплексле хайырланадыла, ол санда  виртуал шлем,  3D-принтер,  квадрокоптерле, тренажёр-манекенле, компьютерле эм башхала.     

Алгъаракълада быллай арала Огъары Малкъарда  бла Бабугентни 2-чи номерли кадет школунда да ачылгъандыла. Аны биринчисине юч жюз сабий жюрюрюкдюле, ала, билимлерин ёсдюргенден сора да,  фахмуларын ачыкъларгъа да онг табарыкъдыла.  Кадет школда да жангычылыкъны эрттеден сакълагъандыла дерге боллукъду.  Мында сабийле да  бирси, мектепледе тенглерича, энчи техника эм гуманитар предметлени  теренирек окъурукъдула.   Аны бла бирге  къошакъ халда  чыгъармачылыкъ, проектле хазырлау бла кюреширикдиле   эм шахматладан  кружокга да жюрюрюкдюле.