Агъач мюлкледе агротехника ишле тамамланадыла

Жыл сайын Къабарты-Малкъарны агъач мюлклеринде  план бла  агротехника ишле бардырыладыла. Аны магъанасы агъач фондну сакъларгъады эм  игилендириргеди.

Быллай жумушланы кезиуюнде аслам эс  алыкъын кюч алмагъан  гитче терекчиклеге бёлюнеди. Ала иги ёсюм алгъынчы, тамырларын жерге теренирек жибергинчи тёгереклерин хансдан, къаурадан эмда башха затладан   тазаларгъа керекди. Ол а  кёбюсюнде къол бла этиледи.  

Саулай айтханда, республиканы тогъуз агъач мюлкюнде тийишли  ишле 1000 гектар чакълы жерде ётерикдиле.  Бюгюнлюкде  ол  «Экология» миллет проектни чеклеринде   «Агъачны сакъла» къырал программагъа кёре апрельден  башлап ноябрьге дери барады. Белгилисича,    ханс терк кётюрюлюп къалгъаны бла терекчикни да  кючюн  алып, къургъакъсытып къояды. Ол  себепден  аны  бирде беш кере окъуна кетерирге тюшеди.

Къаралмаса, къайсы битим да артыкъ иги ёсмейди, айнымайды, ол себепден жаз башында кеч къалмай этилген  кезиулю жумушладан  ашхысы жокъду.