Агропромышленный комплексни айнытырча онгла

Кёп болмай Россей Федерацияны эл мюлк министрини орунбасары Елена Фастованы башчылыгъы бла  видеоконференция халда кенгеш болгъанды. Ол   эл мюлк производительлеге къыралдан болушлукъ этиу къалай бардырылгъанына жораланнганды.  Анга регионлда профильли ведомстволаны таматалары, ол санда  Къабарты-Малкъардан Хасан Сижажев да къатышханды. Аны юсюнден  КъМР-ни Эл  мюлк министерствосуну пресс-службасындан билдиргендиле.

Тюбешиуде  Елена Фастова  быйыл къыралны  агропромышленный  комплексине  федерал бюджетден 73,4 миллиард сом бёлюннгенин,  былтыр бла   тенглешдиргенде  ол  58,3 процентге кёп болгъанын да  белгилегенди. Къабарты-Малкъаргъа да    2,2 миллиард сом чакълы жетгенди. Ол санда аны  0,13 миллионун   республикалы  кесинден къошханды.  Бюгюнлюкде ахчаны 1,4 миллиарды неда  62,5 проценти хайырланылгъанды. Ол битеу къыралда белгиленнген  орта эсепден  эсе иги да  кёпдю. 

Кенгешни ахырында министрни орунбасары регионлада коллегаларына   жылны ахырына дери план бла аграрчылагъа  берилирге керек ахчаны толусунлай жерлерин тапдырырларын да къаты  эсгертгенди.