Финансланы юсюнден билгенигизни туура этерге

Бу кюнледе Къабарты-Малкъарда «Финанс окъуулулукъ» деген соруу бардырылып башланнганды. Аны Россейни Банкыны Югда бёлюмю къурагъанды. Банкда айтханларына кёре ол келир айны онтёртюнчюсюне дери бардырыллыкъды.

«Эсигизге сала айтсакъ, быллай сорууну биз бир жыл мындан алгъа бардыргъан эдик. Жангы анкетада уа кёп тюрлю сфераладан 32 соруу барды. Ол санда  юйюр бюджетни къурау, инвестицияла, ахчаны сакълау, кибергигиена, коронавирусну пандемиясыны кезиуюнде къырал адамлагъа болушлукъ этиу дегенча аллайла да. Аны эсеплерине кёре финанс жарыкъландырыу жаны бла ишибизни толуракъ бардырыргъа амал табарбыз деп ышанабзы», - дегенди банкны республикада бёлюмюню башчысыны орунбасары Аслан Калов.

Россейни Банкы бу сорууну регионда финанс жумушланы женгил бериу онгла къурар, кесин да ахчаны къолдан къолгъа бермей жюрютюуню асламыракъ этер умутда бардырады. Аны бла байламлы миллет  стратегия да барды. Бу ишге ким сюйсе да интернет-сайтха кирип къатышыргъа боллукъду. Аны адреси: https://forms.gle/gogNSj2sE4A58xjs9.

Улбашланы Мурат хазырлагъанды.
Поделиться: