Таксиде ишлегенлеге тийишли амал

Бизни республикада адамланы эмда жюклени женгил такси бла ташыргъа эркинлик берген къагъытны, кеси алларына абери бла кюрешгенле, предпринимательле эмда башхала юридический статус алгъандан сора жарашдырыргъа боллукъдула. Аны юсюнден КъМР-ни Транспорт эмда жол мюлк министерствосундан билдиргендиле. Профессионал халда файда тюшюргенде налог тёлеу (НПД) амалны хайырын кёрюр ючюн, предприниматель ИП ачханында къаллай налог тёлеригин сайлагъан эсе да, андан чыгъаргъа керекди. Ызы бла «Мени налогум» программада НПД-ны кёргюзтюрге. Таксист анда тийишли предприниматель болгъаныны регистрациясын этгенден сора сагъынылгъан лицензияны жарашдырып башларгъа эркинди. Бу жумушну МФЦ-да неда «Госуслуги» интернет порталда (www.gosuslugi.ru) тамамларгъа боллукъду.

Заявлениягъа бир айны ичинде къаралады. Документ а беш жылгъа бериледи. Предприниматель ИП-ны жапса – ол кючюн тас этеди. Тёленирик пошлинаны ёлчеми регионда тарифге кёре тергеледи.

Энчи предприниматель статус алгъан таксист НПД налогну тёлеу системаны, аны жыллыкъ файдасы кеси алларына абери къурап къармашханлагъа белгиленнген мардадан озмаса эмда ишчиле тутмаса хайырланыргъа эркинди.

Бу налог режим - тёлеулени ёлчеми аз болгъаны бла хайырлыды. Дагъыда закон халда контроль-касса техника сатып алмазгъа эмда орнатмазгъа эркинлик бергени бла. Энчи предпринимательство бла байламлы башха борчла уа алгъынча сакъланадыла. Сёз мында страховой тёлеулени эмда  налог отчётну жарашдырып бериуню юсюнден барады.

«Мени налогум» приложение фискальный чеклени жарашдырады. Аланы суратларын ызы бла таксини хайырланнган пассажирлеге электрон почта бла жиберирге боллукъду.