Ветеринар лабораторияны аккредитациясы

Кёп болмай «Халкъла аралы кооперация эм экспорт» миллет проектни чеклеринде бардырылгъан «АПК продукцияны экспорту» регион программагъа кёре  Россейни Федерация бла  Къабарты-Малкъарны  Эл мюлк министерстволары къошакъ халда  келишим этгендиле. Ол  республикада миллет  аккредитация системада аккредитацияны ётген ветеринар лабораторияны къурау бла байламлыды.  Аны иши  жаныуарлагъа  жукъгъан аурууланы эм ветеринар служба  товарланы къоркъуусузлукъларына диагностика бардырыу боллукъду, деп билдириледи КъМР-ни Эл мюлк министерствосуну пресс-службасындан.

- Малчылыкъ бла байламлы аш-азыкъ продукцияны халкъла аралы рынокга  чыгъарырча аккредитациясы болгъан  ветеринар  лабораторияда миллет стандартлагъа келишген тийишли тинтиулени ётдюрюрге  керекди. Келишимге кёре  аллай  ишле  2023 жылда башланырыкъдыла, -  дегенди КъМР-ни эл мюлк министри  Хасан Сижажев.

Къоранчланы азайтырча къырал да кесини жанындан  болушургъа, ахчаны жартысын берирге хазырды.  Сёз  ючюн,  Къабарты-Малкъаргъа федерал бюджетден  31,3 миллион сом бёлюнюрюкдю.  Ол ахчагъа  учрежденияны жангыртыргъа, жангы оборудование сатып аларгъа, ишчилени билимлерин ёсдюрюрге эм бирси  лабораторияла бла бирге тинтиуле бардырыргъа да жарарыкъды.  

Хасан Сижажев айтханыча, республика тышына  асламысында  юй къанатлыланы бла малланы этинден эм сютден  этилген  тюрлю-тюрлю продукцияны сатады.  Бусагъатда ала гитче партияла бла чыгъарыладыла эм кёбюсюнде жууукъ тыш къыраллагъа жибериледиле. Келир заманда  аккредитацияны ётген ветеринар лаборатория ишлеп башласа уа,  къыраланы эм товарланы тизмеси иги кесекге  ёсерикди.