Жаныуарла къыш сууукълада жунчумазча

Энчи сакъланнган табийгъат жерледе (заповедникледе) ишлеген инспекторла  жаныуарла къыш кезиуде жунчумазча  кючлерин аямай алгъадан къармашып башлайдыла.  Ашларын хазырлайдыла, аш салгъан орунларын жарашдырадыла неда жангыларын ишлейдиле,  туз саладыла.   Жыл сайын февраль-март айлада жаныуарланы санын билирча къырал  учёт бардырылады, деп билдириледи КъМР-ни Табийгъат байлыкъла эмда экология министерствосундан.  

Быйыл  жай кезиуде тамамланырыкъ ишлени юсюнден  айтханда,   инспекторла борчларын  толтургъандыла дерчады. Не заманда да  заповедниклени келечилери   жаныуарла туз  эмда балчыкълы кёлчюкле бла жалчытылынырча аслам эс бурадыла. Ол аланы санларын кёбейтиуде эм юйюрсюндюрюуде да ахшы себеплик этеди.

Къыш кезиуде жаныуарланы бла къанатлыланы къошакъ халда аш бла жалчытыу аланы азаймауларына себепликди.  Бютюнда аланы кёбюсю РФ-ни бла  КъМР-ни Къызыл китапларында жазылгъанладыла.  

Быйыл сегиз айгъа аш салгъан 11 жер,  туз берген 54 орун эм  16 балчыкълы кёл жангыртылгъанды. Саулай айтханда,  участоклада  1777 килограмм туз къуюлгъанды.

Аны бла бирге, жыртыхыч жаныуарла, ол санда бёрюле мардадан кёп болуп башхалагъа  хата салмазча  терк-терк контроль бардырылады эм керек болса, аланы  азайтырча мадарла да изленедиле.