Дарман сатып алгъан къоранчны кесегин къайтарыргъа боллукъду

Быйыл РФ-ни Налог кодексине кийирилген тюрлениулеге кёре дарманла сатып алыргъа этилген къоранчланы бир кесегин артха къайтарыргъа боллукъду. Налог службада айтханларыча, быллай амал алгъын да болгъанды. Алай шёндюге дери тёленнген налогну (НДФЛ) кесегин къайтарыр ючюн сатып алыннган дарманла РФ-ни Правительствосу жарашдыргъан тизмеде болургъа керек эдиле. Энди уа врач жазгъан дарманланы бары бла да байламлыды ол. Тийишли тюрлениуле былтыр 147-ФЗ номерли закон бла сингдирилгендиле.

Алай бла къайтарыллыкъ ахчаны ёлчеми 120 минг сомгъа этилген къоранчладан тергелликди. Ары, дарманладан сора да, окъуугъа, квалификацияны ёсдюрюрге, медицина жумушлагъа эмда къауум башха жумушлагъа этилген жоюула да киредиле.

Бу амалны жылны ахырында налог службагъа 3-НДФЛ халда декларацияны берген кезиуде неда ишлеген жерде сурап хайырланыргъа боллукъду. Экинчини сайлагъанда, налог ведомстводан ахчаны къайтарыргъа тийишли болгъаныгъызгъа шагъатлыкъ къагъытны алыргъа керексиз. Аны ючюн а алагъа рецепт жазылгъан бланк эм чек кёргюзтюледиле. Ызы бла, аллай къагъыт къоллу болгъанлай, аны элтип бухгалтериягъа берирге тийишлиди. Анда уа ахчаны иш хакъдан алыннган налогну тыймай алай къайтарлыкъдыла.