Эл мюлк продукция бла экспортну жалчытырча

Къабарты-Малкъарда сегиз айгъа   агропромышленный комплекс (АПК) бёлюм бла байламлы товарладан экспорт жылгъа белгиленнген планны   90 процентинден  асламгъа  толтурулгъанды. 

 - Федерал таможня  службаны эсеплерине кёре  быйыл  республикада сегиз айгъа аш-азыкъ товарладан тышына  18 миллион доллардан асламгъа сатылгъанды. Ол а белгиленнген пландан 92,5 процентди.  Былтыр бу заман бла тенглешдиргенде АПК   бла байламлы продкуцияны экспорту эки кереге ёсгенди, деп билдиргендиле  КъМР-ни Эл мюлк министерствосундан.

РФ-ни Эл мюлк министерствосу бла КъМР-ни Правительствосуну келишимине кёре, «Халкъла аралы кооперация эм экспорт» миллет проектни чеклеринде  «АПК продукцияны экспорту» деген  республикалы проект бла байламлы  быйыл  19,5 миллион долларгъа эл мюлк продукция  сатаргъа мурат этиледи.

Эсге сала айтсакъ, бюгюнлюкде Къабарты-Малкъар 19 къыралгъа юй къанатлыланы этин, татлы ашарыкъланы, сютден этилген продукцияны, гара эм татлы сууланы, жемишлени эм нартюхню гибрид тюрлюлерин сатады.