Чегем – битеуроссей конкурсда хорлагъанланы санында

РФ-ни Правительствосу  ырахат шахар болум къурау жаны бла проектлени 4-чю битеуроссей конкурсуну эсеплерин чыгъаргъанды. «20 минг адамгъа дери жашагъан гитче шахарла» деген къауумда хорлагъанланы санына Къабарты-Малкъарны Чегем шахары да киргенди.

Проектге кёре Чегемни ара шахарында 4 энчи тийре къураллыкъды: маданият, спорт, сабий эмда солуу. Дагъыда терекле салыу, айбатландырыу, жаяу жолчукъла къурау, гитче архитектура формала тохташдырыу, сабийле ойнарча майданла жарашдырыу жумушла да тамамландырыллыкъдыла. Саугъа ахчаны ёлчеми  50 миллион сомду.

РФ-ни Правительствосуну Председателини орунбасары, федерал комиссияны таматасы Марат Хуснуллин айтханнга кёре, конкурсха къатышыргъа сюйгенле бек кёпдюле. Быйыл 301 заявка берилгенди. Былтыр бла тенглешдиргенде, «тарых элле» эмда  «20 минг адамгъа дери жашагъан гитче шахарла» деген къауумлада къатышыргъа сюйгенле бютюн кёп чыкъгъандыла – битеу да 137 заявка келгенди.

Тёртюнчю эм андан сора бардырыллыкъ конкурслагъа бёлюнюрюк ахча РФ-ни Правительствосуну оноуу бла эки кереге кёбейтилгенди – беш миллиард сомдан он миллиард сомгъа дери. Хорлагъанланы тизмесине уа  бир жолгъа 160 гитче эм уллу шахарла тюшгендиле.

«Конкурсну ахча фондун эки кереге ёсдюрюу бизни гитче шахарларыбызгъа къолайлы тутхучлулукъ боллукъду. Ала уа иги кесек бардыла - 1118 россейли шахардан  950-ден артыгъы гитчеледиле эм тарых магъаналыдыла. Ахча бла себеплик этиу, артыкъда шёндю, коронавирус уллу хата салгъан кезиуде, магъаналыды.
Конкурс бир жолгъа талай керекли борчну тамамлайды. Аны хайырындан биз уллу шахарладан башхалагъа жангы жашау кюч беребиз, алада предпринимательлеге себеплик этебиз, къолайлы  инвесторланы табаргъа болушабыз», - деп чертгенди РФ-ни къурулуш эмда жашау журтла-коммунал мюлк министри Владимир Якушев.