Элледе предпринимательлени кёллендирген амалла

Къабарты-Малкъарны Эл мюлк кооперация эмда фермерлеге себеплик этиу жаны бла компетенцияланы регион арасы  юч миллион сом къоллу болгъанды. Ахчаны  асламысы федерал бюджетден  берилгенди, аз кесегин а республиканы бюджетинден къошхандыла, деп билдиргендиле республиканы Эл мюлк министерствосундан. Болушлукъ «Гитче, орта эмда энчи предпринимательство бла кюреширге себеплик этиу» деген миллет проектни чеклеринде къуралгъан «Фермерлеге себеплик этиу системаны къурау эмда элледе кооперацияны айнытыу» регион проектни юсю бла бёлюннгенди.

Сагъынылгъан арада  элледе  гитче эмда орта предпринимательство бла кюрешгенлеге методика эмда консультация болушлукъ бередиле. Анда предприятияланы (не гитчесине да) ветеринария, зоотехния, агрономия, технологияла, бухгалтерия, юридический, маркетинг эм кёп башха жаны бла себеплик этедиле. Учреждение арасы къуралгъанлы эки жыл болады. Алай ол къысха заманны ичинде окъуна иши хайырлы болгъанын кёргюзтгенди. Аны специалистлери грантла эмда субсидияла алыргъа сюйгенлени документлерин жарашдырыргъа  болушадыла. Эл мюлк министерствода тийишли конкурс айырыулада хорлагъанланы уа келишим этерге  ары жибередиле.

Мында элчи-ферма мюлклерин (КФХ) къырал эсепге салыргъа болушадыла. «Агростартап» грантла къоллу болургъа сюйгенлеге уа келишимге «Электронный бюджет» системада къол салыргъа онг бериледи.

«Анда арендаторланы, фермерлени, башхаланы да къырал берген болушлукъну тюрлюлери бла шагъырейлендириу, кооперация къалай бла  хайырлы  болгъанын  ангылатыу, гитче предпринимательствогъа кредит-гарантияла эмда лизинг болушлукъ алыргъа себеплик этиу, консультацияла бериу ишлени  иги къуралгъандыла. Ол а  республикада эл мюлк кооперацияны тири айнытыргъа,  производство  къоранчланы азайтыргъа, сырьёну качествосуна тынгылы контроль этерге, рынокда конкуренциягъа бютюнда чыдамлы болургъа болушурукъду», - дегенди Къабарты-Малкъарны эл мюлк министри Хасан Сижажев.