Жамауатны келечилери шахарда тазалыкъны контрольда тутадыла

Битеуроссей халкъ фронтну Къабарты-Малкъарда бёлюмюню келечилери Майский шахарны администрациясына сёлешип, анда орамлада къалгъан-къулгъанла жыйылып тургъан жерлени тазаларгъа, ачылып тургъан къуюланы башларын люкла бла жабаргъа чакъыргъандыла, деп билдиргендиле ОНФ-ни пресс-службасындан.

Жамауатны келечилери ол кемчиликлени юслеринден гражданла айтып  билгендиле. Шахарда арбазлада къурулуш ишледен сора къалгъан-къулгъанла тёгюлюп тургъаныны юсюнден ОНФ-ге кёпле тарыгъыула жиберген эдиле. Ызы бла бардырылгъан тинтиуле ол сёзлени тюзлюгюн тохташдыргъандыла.

Майскийде талай кёпфатарлы юйлени арбазларында тапландырыу ишле бардырыладыла. Аны ючюн ол тийреледе къалгъан-къулгъанла да болмай къалмайды. Алай аланы ыйыкъла бла кетермей туруу а тюз тюйюлдю. Тёбеледе уа бетон, таш сыныкъладан сора эски чархла, бутакъла, тот быргъыла да кёргендиле активистле. «Жауун жауса тёгерек-баш батмакъ болуп бютюнда эриши кёрюнеди. Адамлагъа аллай тёбелени къатларында жашагъан хычыуун тюйюлдю», - дегенди ОНФ-ни регион штабыны башчысыны орунбасары Андрей Попета.

Дагъыда рейдни кезиуюнде организацияны келечилери орамлада бир ненча къуюну башлары жабылмай тургъанын кёргендиле. Андан сора да тазалыкъ бла байламлы талай кемчилик тапхандыла. Энгельс атлы орамда кёпфатарлы юйледен бирини арбазында уа тапландырыу ишле чыртда башланмагъанын эслегендиле. Муниципал келишимге тийишлиликде алайда  быйыл сентябрьни ахырына дери мадар этерге керекди. Подрядчик а ишни башлагъан окъуна этмегенди.

Алай бла битеу кёрген, эслеген затларыны юсюнден активистле, айтылгъаныча, шахарны мэриясына эсгертиу жибергендиле.