Агъачланы жангыртыуну къолгъа алгъандыла

Бизни къыралда 2022 жылгъа битеу къырылгъан неда къуруп кетген агъачланы бары да жангыдан къуралыргъа, бу мюлкге от хар жыл сайын салгъан заранны багъасы уа юч кереге азайыргъа (32 миллиард сомдан – 12 миллиардха дери) керекди. Бу борчла «Экология» миллет проектге кирген «Агъачланы сакълау» федерал проектде белгиленедиле, деп билдиргендиле КъМР-ни Табийгъат байлыкъла эмда экология министерствосундан.

Регион проектде да ол борчланы юсюнден толу айтылады. Тийишли жумушланы тамамлаугъа быйыл къыралны бюджетинден 43,6 миллион сом жиберилгенди. Ол санда 8,8 миллион сом агъачланы кёбейтиуге къоратыллыкъды.

Бу проектни чеклеринде министерство кёп болмай 102 гектар жерде 250 минг терекчик орнатханды. Ол санда: эмен, юрге, чынар, кюйрюч да. Дагъыда мингден артыкъ гектарда тапландырыу ишле бардырылгъандыла. Терекчиклени уа «Каббалклесопитомник» бергенди. Анда жыл сайын аладан бир миллиондан артыгъын ёсдюредиле.