Татарстан миллет тилледеги газетлени рекордун тохташдыргъанды

Бюгюнлюкде Россейде миллет тилледе 2,5 минг газет чыгъады. Аланы  22 проценти уа Татарстанда басмаланады. Алай бла шёндю бу республикада 574 газетни анда жашагъан халкъланы тиллеринде окъургъа боллукъду. Аны юсюнден регионну «Татмедиа» басма эм асламлы информация коммуникацияла агентствосу билдиреди.  

Аллай жетишим социал сетьлени кереклисича хайырланыу бла да байламлыды. Сёз ючюн, чуваш тилде чыкъгъан «Сувар» газетни социал сетьледе окъуучуларыны саны бир жылгъа 23 процентге ёсюп, 9 мингнге жетгенди. Бир айны ичинде уа аны сайтда 2 минг адам окъуйду.

Россейни цифралы айныуну, связь эм асламлы коммуникацияланы министрини орунбасары Алексей Волин бюгюнлюкде Татарстан тохташдыргъан рекордха жууукъ заманда бир регион да жетишалмазлыгъын чертгенди.

«Татмедиа» холдингни кесини бюгюнлюкде 81 сайты барды. Алагъа сейирлери болгъанланы саны бир суткагъа 196 мингнге жетеди. Бу шарт быллай къырал организация кесини ишин къалай къураргъа кереклисине ахшы юлгюдю деп толу айтыргъа боллукъду.