Быйылны да жетишимли башлагъандыла – беш майдал къытхандыла

Элбрус районну спорт школуну баш борчларындан бири даражалы эришиуледе хорлаяллыкъ спортчуланы хазырлауду, ала бу ишни жетишимли да толтурадыла. Жылдан-жылгьа школда къарыулу, бийик усталыкълы гёжефлеге уллу спортха жол ачылады. 2018 жылда да ахшы тёре бузулмагъанды – Аслан Толовха Россейни спортуну устасы деген ат берилгенди, Тебердиланы Таулан, Кациланы Абдурахман бла Лукияланы Аслан спортну устасына кандидатны мардасын толтургъандыла. Школгъа бусагъатда жюрюгенлени араларында бири спортну сыйлы устасыды, тёртюсю спортну устасыдыла, ючюсю спортну устасына кандидатдыла. Дагъыда 260-дан аслам адамгъа тюрлю-тюрлю спорт разрядла берилгендиле, жетеулен Россейни жыйымдыкъ командасына киредиле.

Школда эки бёлюм ишлейди – грек-рим тутушуудан бла спорт гимнастикадан. Алада жарауну 346 адам этеди: сабийле, жаш тёлю, абаданла да. Ала 27 къауумгъа юлешинедиле, ол санда башланнган хазырланыу, жарау этиу эм бийик спорт усталыкъ жаны бла да. Спорт школну филиаллары Кёнделенде бла Быллымда да ачылгъандыла, анда грек-рим тутушуудан гёжефлени хазырлайдыла. Юйретиу ишни Россейни сыйлы тренери Локияланы Юрийни башчылыгъында 17 тренер бардырадыла.

Былтыр школну спортчулары 47 республикалы, битеукъырал эм халкъла аралы эришиуге къатышхандыла, аладан кёп майдал да келтиргендиле. Алгъын жылладача, быйыл да Локияланы Жамболат къууандыргъанды. Мордовияны командасыны санында ол Россейни кубогунда – биринчи, дунияны кубогунда да экинчи болгъанды, дунияны аскерчилерини араларында бардырылгъан чемпионатында - «алтынны», «Иван Поддубныйни гран-прийинде» «доммакъны» къытханды.

Башда сагъынылгъан кубоклада Локияланы Мурат да ахшы кёрюмдюле болдургъанды, ол СССР-ни сыйлы тренери Владимир Борманны хурметине аталгъан эришиуде да хорлагъанды. Аслан Толов Россейни биринчилигинде экинчи жерни алгъанды, къырал эм халкъла аралы даражалы турнирледен кюмюш эм доммакъ майдалла бла къайтханды. Россейни 18 жыллары толмагъан спортчуланы араларында биринчиликде эм кючлюлени санына Бичеккуланы Даулет киргенди, ары дери уа ол ЮФО-ну биринчилигинде хорлагъанды.

СКФО-ну биринчиликлеринде кеслерини жыл санларында эм ауурлукъ къауумларында Лукияланы Аслан бла Кациланы Абдурахман алтын майдалла къытхандыла. Чеченланы Амаль, Къудайланы Заур, Балаланы Алим, Ёзденланы Къайсын, Махийланы Азрет, Отарланы Мурат, Бапиналаны Къурман, Гочияланы Абдурахман, Жеттеланы Алан, Артур Лотоков, Шауаланы Шамил эм башхала да атларын айтдыргъандыла.

Спорт гимнастикагъа да кёп сабий жюрюйдю. Ала жарауларын чурумсуз бардырырча битеу мадарла этилгендиле. Тренерле сабийлени саулукъларын кючлеуге къайгъырадыла, аланы эришиулеге хазырлайдыла.
2018 жылда жаш гимнастла Байдаланы Милана, Бэлла Губашиева, Османланы Диана, Жашууланы Инара ахшы кёрюмдюле болдургъандыла. Алай бла грек-рим тутушуудан тренерле Этезланы Хусей, Чеченланы Артур, Хапаланы Аслан, Ачабайланы Музафар, Балаланы Алим, гимнастикадан тренер Наталья Губашиева аслам жылны ичинде умутландыргъан спортчуланы юйретедиле.

Школда хар заманда да спорт эм физкультура бла не къадар кёп сабий кюреширине, ала жетишимли болурларына, айнырларына эс бурулгъанды. Ол Элбрус районну Физкультура эм спорт комитети бла бирге Тырныауузда грек-рим тутушууну биринчи жайып башлагъанла Байзуллаланы Юсюпню бла Мирзоланы Хызырны, спорт школну алгъыннгы директору Сабанчыланы Расулну хурметлерине аталгъан битеуроссей эришиулени къурайды. Билим бериу управление бла тёрели халда районну окъуучуларыны араларында спартакиаданы бардырады, былтыр анга 1000-ден аслам адам къатышхан эди.         

Быйылны да школну спортчулары жетишимли башлагъандыла – ала республиканы биринчилигинден беш майдал келтиргендиле. Юлгю алырча адамлары уа аланы барды, сёз ючюн, Локияланы Жамболат алгъаракълада Россейни чемпиону болгъанды. Бусагъатда юйреннген сабийлени алда кёп эришиу сакълайды, ала жетишимли болурларына уа толу ийнанырчады.

 

Анатолий ТЕМИРОВ.
Поделиться: