Полимерлени бла компазитлени жангы технологиялагъа кёре

Къабарты-Малкъар къырал университет «Титан» корпорация бла  бирге   полимерлени  бла композитлени экологияны излемлерине келишген  тюрлюлерин чыгъарыр муратлыдыла. Аланы  автомобиль, медицина, аш-азыкъ жарашдыргъан оборудованияланы   ишлеуде эм промышленностьда да  хайырланыргъа боллукъду.  

- Кёп болмай Россей Федерацияны илму-технология жаны бла айнытыуну  стратегиясыны  Советини кенгешинде  тийишли   илму-излем проект (КНТП)  къабыл этилгенди.  Аны бла байламлы КъМКъУ-ну  прогрессив материалла эм аддитив технологияла жаны бла арасыны алимлери   илму-техника  консорциум  къауумунда  - Россейни илмула академиясыны,   Г.К. Боресков атлы   Нефтехимияны А.В. Топчиев атлы  институтланы,  Москвада  М.В. Ломоносов атлы къырал эм Россейни технология университетлерини  келечилери бла бирге   ишлерикдиле, -дейди КъМКъУ-ну  илму-излем жаны бла проректору   Светлана Хаширова.

Проектни багъасы 14,8 миллиард сомгъа жетеди, андан 12 миллиард сомну «Титан» корпорация  кесини бюджетинден  бёллюкдю.

Эсге сала айтсакъ, КНТП-ни илму-технологияны эм саулай  промышленностьну  айнытыуда да магъанасы уллуду.  Анга къырал, илму эм бизнес бёлюмле  да тири къатышырыкъдыла. Ол аслам адам къармашхан,  тохтаусуз бардырылыргъа керек болгъан ишди.  Сёз ючюн,  лабораториялада къуралгъан жангы продукция  рынокда сурамны жалчытыргъа   тийишли. 

Магометланы Сулейман.
Поделиться: