Юйсюз итлени кёплюгю - жамауатха къоркъуулуду

Кёп болмай Битеуроссей халкъ  фронтну Къабарты-Малкъарда бёлюмю(ОНФ) республиканы Правительствосуна хауле итле контрольгъа алынырча   обращение  жибергендиле. Эсге сала айтсакъ,  бу жаны бла    эрттеден бери  республикада тийишли  закон  ишлейди. Болсада,  анга да къарамай,  жыл сайын жамаутдан аслам тарыгъыу келеди. Аланы асламысы Нальчикни орамларында бла муниципал  районлада хауле итлени кёп жайылгъанларыны сылтаууду.   

 - Жыл сайын юйсюз итлени санына дайым къошула баргъаны, алагъа энчи приютла  болмагъаны бусагъатда  уллу проблемаладан бириди. Ол себепден  жамауатны къайгъысын ангыларчады, ачыгъанланы  кёбюсю сабийле, тиширыула эм пенсионерледиле.  Аны бла бирге  хайуанлагъа терк-терк артыкълыкъ этилгенине да  тюберге тюшеди. Ол шарт а жаныуарланы къоруулагъан  жамауат организацияланы жарсытады,  дейди ОНФ-ни келечиси  Евгений  Бакаев. 

Ол айтханнга кёре, бу жаны бла кёп кере «тёгерек столла» эм башха жыйылыула да бардырыладыла. Болсада алкъынчы болум иги жанына тюрленирча уа  зат этилмегенди. Кертисин айтханда, жамауатны кесинден да къалады,   Нальчикни, Бахсанны эм Прохладнаны администрациялары    хауле итлени  тутарча электрон халда  аукцион бардыргъанлы бир ненча ай болады, алай аны ючюн   бир заявка келмегенди.

ОНФ-ни келечилери  юйсюз  хайыуанлагъа  регион неда муниципал магъаналы приют ишленирге керегин, бу жаны бла законодательствогъа тийишлиликде ишлерча энчи иелини  къолундан келмезлигин да белгилейдиле.     Аны бла бирге  власть органла аланы жарсыуларына эс этерлерине ышаннганларын да букъдурмайдыла. Нек дегенде  жамауатны къоркъусузлугъу хайыуанлагъа заран жетдирмезча болургъа керекди.