Къурулушчула ишлерин тынгылы этгендиле

«Демография» миллет проектни чеклеринде Майский шахарда биринчи номерли гимназияны къатында «Тейри къылыч» ясли ишленнгенди. Районну администрациясыны башчысы Татьяна Саенко бу кюнледе ары барып, хар неге да къарагъанды, деп билдиргендиле администрацияны пресс-службасындан.

Яслини келечиси Светлана Карпенко къонакъгъа учрежденияны отоуларын кёргюзтгенди. Ол айтханыча, ары юч жыллары толмагъан сабийле жюрюрюкдюле. Алагъа деп хар неда барды: гитче спортзал, ойнарча, жукъларча отоула да. Объект битеу кереклиси бла жалчытылыныпды; ашханада бла медицина кабинетде  оборудованиялары барды, отоулада мебель, сантехника да. Арбазында къурулушчула кёк назы терекчикле орнатхандыла. Кюзде уа яслини ишчилери алайда гюл бахчачыкъ къураргъа сюедиле.

«Сабий садик эркин, жарыкъ, кеси юйюнгдеча аллай жылы болгъанды. Къурулушчула ишлерин кёл салып этгенлери кёзге бек кёрюнеди», - дегенди Татьяна Саенко.

Жууукъ кезиуде объект республиканы иелигинден районнга берилликди. Ызы бла уа ары сабийле жюрюп тебирерикдиле.