Жаш тёлюню юйретиуде бирге ишлерге келишгендиле

Россейни Миллет гвардиясыны КъМР-де Управлениясы бла «Альтаир» жаш тёлю клуб   бирге ишлеуню амалларын сюзгендиле. Управленияны башчысы полицияны полковниги Сергей Васильев граждан обществону айнытыугъа себеплик этген «Созидание» организацияны бла Орус география обществону «Альтаир» жаш тёлю клубуну таматасы Мокъаланы Тенгиз бла тюбешгенди.

Бу биригиу а 2017 жылда къуралгъанды. Бюгюнлюкде ол Орус география обществону  бек иги жаш тёлю он къымылдаууну  санына киреди. Аны баш борчу - сабийлени бла жаш адамланы фахмуларын, хунерлерин ачыкълауду, аланы патриот ниетде  юйретиудю, экологиягъа кёз къарамларын тюрлендириудю, спортха бла саулукълу жашауну жорукъларына сейирлерин къозгъауду.

Тюбешиуге Росгвардияны Управлениясыны штабыны таматасы полицияны полковниги Мурат Мешев, право жаны бла бёлюмню башчысы полицияны полковниги Борис Майрансаев, Управленияны башчысыны асламлы информация органла бла байламлыкъланы къурау жаны бла болушлукъчусу полицияны полковниги Ольга Исаева эмда кеси состав бла ишлеу жаны бла бёлюмню таматасыны болушлукъчусу капитан Аслан Тубаев да къатышхандыла.

Эки жаны да ёсюп келген тёлюню юйретиуню амалларын  сюзгендиле. Быйыл окъуу жылда школлада аскер-патриот оюнла къураргъа келишгендиле. Андан сора да, ёсюп келген тёлюню Росгвардияны ишини энчиликлери бла шагъырей этерге, аскер-патриот дерсле бардырыргъа оноулашхандыла. Мокъаланы Тенгизни акъылына кёре, ол келир заманда жашауларын аскер бла байларгъа сюйген жашлагъа бютюнда магъаналыды. «Аллай тюбешиуле усталыкъны сайлагъанда тюз оноу этерге болушурукъдула»,-деп чертгенди ол.

Жыйылыугъа къатышханла байламлыкъла кючленириклерине, ала хайырлы боллукъларына ышаннганларын чертгендиле. «Миллет гвардияны жаш тёлюню юйретиу жаны бла сынауу уллуду. Аскерчиле ёсюп келген тёлюню бу усталыкъны жашырынлыкъларына тюшюндюрюрге хазырдыла. Бу иш алагъа сейир боллугъуна эмда жангы билим берлигине ишексизме»,-деп чертгенди жыйылыуну ахырында Сергей Васильев.