Чемерликден, чомартлыкъдан да къуру болмагъан Исса

Бир жол Нальчикде концерт залладан биринде жырны байрамы бара эди. Анда белгили артистлерибизге, адамларыбызгъа Быллым элден Къудайланы Исса кимине къамичи, кимине гоппан,  ариу ишленнген мюйюз, дагъыда башха затладан саугъала бере эди. Ол заманда аны бла танышыр онг тапмагъанма.

Кёп болмай а  Тырныаууздан келе, жол нёгерлерим бла Иссаны юйюне къайтабыз. Уллу кенг арбазда  тапкалада, къабыргъада да ол агъачдан ишлеген омакъ затла салынып турадыла. Аланы араларында чыракъ орун, уллу эмда гитче гоппанла, къамичиле, гюл суратла, гулоч таякъла, стол, шинтикчикле, мюйюзле, дагъыда кёп башха затла да кёребиз.

Хар бирибиз да биришер затын къолубузгъа алып,  ары-бери айландырып къарайбыз. Иссаны хаты башхалагъа ушамайды. Ол артыкъ базыкъ болмагъан агъачны юсюнде ишлеген гюлле алай сейирликдиле! Бираз къарап турурса. Чегемде буруннгулу къаланы  сыфатын да ол агъачда къайтаргъанды.

-Бу къала эртте оюлгъанды,  мен аны тарыхыбыз тас болуп къалмасын деген хыйсапдан  ишлегенме,-дейди Къудай улу.

Быллымчы агъач устаны этгеними сатайым да, байыгъайым деген акъылы жокъду. Ол аланы саугъаларгъа бек сюеди,  ата-бабаларыбыз къолларында жюрютген затла унутулуп къалмазларына  къайгъырады. Кеси билген затлагъа элде сабийлени да ма аны ючюн юйретеди.

1980 жылда Къабарты-Малкъар къырал университетни  филология бёлюмюн бошагъандан сора Исса Терс-Къолда школда ишлеп башлайды. Ызы бла, маллагъа къарагъан атасына болушлукъ керек болуп,  туугъан элине - Быллымгъа - къайтады. Андан ол кёп затха юйреннгенди, ол санда  дарман хансланы да билгенди. Аны къатында юй да салгъанды. Этезланы Индира бла бир юйюр къурап, эки сабий ёсдюргенди. Бюгюн тёрт туудукъну аппасыды. 

Аны жюреги тартхан дагъыда бир хунери барды - ол назмула жазады. Алада кесини сагъышларын билдирирге итинеди, табийгъатны тамашалыгъына, адамлыкъгъа, шуёхлукъгъа махтау салады.   Бюгюн сизни аладан бири бла шагъырей этерге сюебиз.

Адамлыкъгъа жол изле
Миллетчилик болсун узакъ,
Ол кёплени этди тузакъ.

Таулу да бол, черкес  да бол,

Адамлыкъгъа изле сен жол-
Бусурманны борчуду ол.
               *** 
Салам санга, окъуучум,
Эсен хапар соруучум!
Эки башлы Минги таудан,
Андан сора Жылы-Суудан,

 

Табийгъат ариулугъундан,
Солтанны да чучхурундан,
Ёхтем къалкъгъан къушладан,
Къаялы ауушладан,

 

Сууукъ гара сууладан,
Тау башында бууладан  
Ата журтумдан салам!
Тоя билмейди къарам!

Суратланы автор алгъанды.

Холаланы Марзият.
Поделиться: