Бек магъаналы минералладан бири

Алгъаракъда  Фейсбукда тенглеримдин бирини – журналист эм жазыучу  Марина  Ахмедованы постун окъуйма: аны эчкиси Земфирка жеринден тебалмай къарыусуз болады. Фейсбукчула: «Ненча килограммды Земфирка? Ёлгюнчю союп къояргъа керекди, эти халал боллукъду», - деп жаза эдиле. Алай аны иеси:  «Земфирка бизни юйюбюзде малча угъай, адамча аллай даражадады. Биз аны соярыкъ тюйюлбюз. Тилейме, бир терен билимли ветеринар бар эсе, айтыгъыз, не зат этерге кереклисин Земфирканы жашаугъа къайтарыр ючюн», - деп къатлап къайтарып тургъанды.

Чыкъгъанды аллай ветеринар, ол эчкиге …витаминле  жетмегенин эм къаллайла ичерге кереклисин айтханды. Не сейир, Земфирка кертиси бла да жашаугъа къайтханды. Витаминле бла минералла  адамлагъа да бек керекли затладыла. Ала  саулукъну эм ариулукъну мурдорудула. Бюгюн врач-кардиолог  Жанатайланы Людмила  кремнийни юсюнден айтады:

- Кремний жетишмесе, адамны чачы да тюшеди, сыфаты да бузулады деген керти хапармыды?

- Хау, бу минералгъа жашлыкъны элементи деп бек тюз айтадыла, нек дегенде, къартайыуну сылтауу адамны чархында  аны жетишмегени бла къаты байламлыды. Бизни терибизни жумушакълыгъы эм сыйдамлыгъы, тишлерибизни эм тырнакъларыбызны ариулукълары, чачыбызны къалынлыгъы, къан тамырларыбызны саулукълары да аны бла къаты байламлыдыла.

Чархыбызда Менделеевни таблицасыны элементлери барысы да болгъанлары бир кишиге да жашырынлыкъ тюйюлдю. Кремний ич органланы барысыны да этлеринде болгъаны да баямды. Ол къан тамырланы, жикледе кемирчеклени, тамырланы, сингирлени созулууларын, бюгюлюулерин жалчытады, бизни битеу чархыбызны тап ишлеуюне себеплик этеди.

Къысха айтханда, чархыбызда болгъан битеу элементлени кёп къалмай барысы да аны хайырындан эрип сингедиле бизни чархыбызгъа. Ол жокъ эсе, неда жетишмей эсе, бирси элементлени барысы да бизге хазна хайыр бермейдиле. Кремний адамланы барысында да кереклисича мардада хазна турмайды. Аны сылтаулары уа жашауубуз, ичген сууубуз эм ашагъан ашыбыз тийишли качестволула болмагъанлары бла къаты байламлыдыла. Магнийни жетишмегенини белгилери уа быладыла: терк арып къалыу, къаныбызны бузулууу (ачыуланыу), депрессия халны чыгъыуу, кёзлерибизни къарыусузланыулары эм аллай башха затла.

-Кремнийни жетишмегенини ызындан не ауруула келирге боллукъдула?

-Жылла оза баргъанлары сайын кремний бизни чархыбызда аздан-аз болады, алай бла уа «цивилизацияны ауруулары» - атеросклероз, инфаркт, инсульт, диабет, катаракта, полиартрит, импотенция - жайыладыла. Бу элементлери  жетишмегенлени араларында жаланда къартая баргъан, адамла, сабийден ауурлукълары болгъан эм сабийлерине ёшюнлерин салгъан тиширыула угъай, нерваларына дайым ауурлукъ жетип тургъан, кючню-къарыуну излеген иш бла аз кюрешген, жюрюмей, къымылдамай тынчайып тургъан, сюзюлмеген сууну ичгенлей жашагъан адамла да кёп тюбейдиле.

Тинтиулени кезиулеринде ачыкъланнганыча, адамны чархы тюз ишлер ючюн, бизни хар бирибиз кюн сайын 10-20 миллиграмм кремнийни ашап турургъа керекбиз, алай, орта эсеп бла айтханда уа, биз сутканы ичинде бу элементни жаланда 3,5 миллиграммын хайырланабыз. Бизни чархыбыздан а кюн сайын аны 9 миллиграммы кетгенлей турады.

-Биз кесибизни чархыбызда болгъан кремнийни сатылып алыннган витаминлени ичип да толтураллыкъбыз. Алай тюйюлмюдю?

-Мен табийгъат кеси саугъагъа берген затланы таблетка формалада сатып алыуну терсге санайма. Кремний ташла бизни чархыбызны кючлерге бек ахшы себеплик этерикдиле.                              

Александр Македонскийни аскерчилери, уруш жолгъа атлана туруп, биргелерине кремний ташчыкъладан толтурулгъан хуржунчукъланы алыргъа борчлу эдиле. Алай этиуню Пётр Биринчи да излей эди аскерчилеринден. Кремнийни ичер сууну тазалау кючю болгъанын эки аскер башчы да уста биле эдиле.

Сууну ичинде тургъан кремний аны составын тюрлендиреди: аллай суу таза эм татыулу болады. Кремний аны ичинде хаталы микроорганизмлени ёлтюреди, чириуню къозгъагъан, сууну ачытхан бактерияланы жокъ этеди, хлорну хаталы кючюн кетереди эм радионуклидлени ёлтюреди. Аллай сууну ичгенде, адамны кёп тюрлю аурууладан багъаргъа онгла табыладыла.

*  Къан тамырланы тышларын кючлейди эм жангыдан къурайды;

*  Атеросклероздан къоруулайды;

* Чегилени тап микрофлораларын жангыдан къурайды;

* Бюйрекледе, бауурда, ёт орунда эм къууукъда ташланы, юзмезни эритеди эм чыгъарады;

* Диабетден ауругъанланы къанларында болгъан бал тузну азыракъ этеди эм аллай саусузланы ауурлукъларын азайтады;

* Къанда холестеринни азайтады;

* Баууру ауругъан адамны халын, ётню кетерип, игилендиреди;

* Адамны чархында болгъан веществоланы алышыныуларын тапландырады;

* Арыуну кетереди.

Юсюнге сюртюп хайырланнганда, кремний суу ачланнган жараланы (пролежни), кюйген жерлени, жараланы, чийленнген жерлени, трофический жараланы, терини юсюнде кичитген чапырыуланы иги кетереди. Башны аллай суу бла жууу, терисин жибитиу чачны иги ёсдюреди.

Къара неда къаралдым-боз кремний ташны тенгизни жагъаларында жыяргъа, аптекалада неда энчи тюкенледе сатып алыргъа боллукъду.

-Кремний сууну къалай жарашдырыргъа боллукъду?

-Ючлитрлик банкагъа 20-25 грамм кремнийни салыгъыз, крандан алыннган сууну ары къуюгъуз. Банканы башын марля бла къысыгъыз, жарыкъ жерде тутугъуз. Алай анга кюнню таякълары жетерге керек тюйюлдюле.

Аллай суу бла ашарыкъла жарашдырыр эм аны ичер ючюн, ол банка жарыкъ жерде 2-3 кюн турса тамамды, аны багъыуда хайырланыр ючюн а, 5-7 кюн озаргъа керекди.

Алай жарашдырылгъан сууну тюбюне чёкгенин а - 3-4 сантиметрин - тёгюп къоюгъуз. Кремнийни акъгъан сууну тюбюнде тутуп жуууп, ол жангыдан кюч алыр ючюн, эки сагъатны ичинде кюн тийген жерде тутугъуз.
Андан сора уа ташланы юслерине жангы суу къуюп, дарман сууну жарашдырыуда хайырланыргъа болады. Алайды да, кремний арталлыда къоратылмагъан материалды.

Кремний ичинде тургъан сууну къайнатыргъа арталлыда жарамайды. Жарашдырылып хазыр этилген сууну уа къайнатыргъа болады. Кремний сууну башы жабылгъан адырда юйню ичиндегича температурада тутаргъа керекди.

Быллай суудан къаллай бирин ичерге кереклисини юсюнден бир белгили марда кёргюзтюлмейди.Бир-бир алимле айтханнга кёре, аны 1,5-2 литри тамамлыкъ этеди.

Аллай онг болмаса уа, бир кюнню ичинде 1,5-шер стакандан сууугъуракълай 3-5 кере, ууакъ уртламла этип, ичерге керекди. Алай быллай оюм да барды: аллай сууну багъыу мурат бла дайым ичип турургъа жарамайды. Аны бек кёбюнден 2-айлыкъ курсла бла, арадан иги кесек заманны оздуруп, ичсе тапды.

-Кремний сууну ичерге жарамагъан адамла да бармыдыла?

-Кремний сууну хайырланып башлардан алгъа пациентле врачла бла ушакъ этерге тийишлидиле. Сёз ючюн, онкология ауруулагъа къоркъуулары болгъан саусузла кремний сууну арталлы да ичмеселе игиди.